Dhuna ndaj një të riu në Tiranë, pranë rrethrrotulimit të Freskut është bërë me porosi të Gjoke Ndrevatajt (Aron) dhe Xhemal Ukës (Fire). këta dy të fundit, dyshohet se kanë porositur Helidon Markun për ta rrahur vetëm prej komenteve që ai u ka bërë gjatë kohës që ata bëjnë live në rrjetin social.
I plagosuri i ka sharë me fjalë të rëndë, dhe për këtë arsye kanë vendosur të porosisin rrahjen e tij brutale. Helidon Marku e ka qëlluar me çekiç në kokë disa herë duke i shkaktuar dëme të konsiderueshme. Komisariati nr. 4 për disa ditë punoi për zbardhjen e ngjarjes, ndërsa identifikoi autorin Marku.
Ai u ndalua në Shkodër, në shtëpinë e tij, me ndihmën e Policisë së Shkodrës dhe iu komunikua arresti në Tiranë. Marku rezulton i dëmnuar me 11 vjet e 8 muaj burg në Itali për plagosjen e 4 marokenëve dhe 2 shqiptarëve. Në Shqipëri ka kryer 6 vite të dënimit, edhe për armë pa leje dhe shitje droge.
Kjo nuk është hera e parë që Gjoke Ndrevataj, i njohur në TikTok me emrin “Aron” përfshihet në porosi për dhunimin e personave të tjerë. Burime bëjnë me dije se më herët ka porositur rrahjen edhe të personave të tjerë, shqiptarë në Gjermani dhe Itali.
