Zbardhen detaje të reja nga vrasja e Nikolin Nikës, 42 vjeç, i cili u gjet i vdekur me tre plagë në qafë përpara një lokali në ‘Viale Delle Vittoria’, në Bettola të Italisë, pasditen e 24 nëntorit. Viktima, me origjinë nga Shkodra, jetonte prej vitesh në Bettola dhe ka lënë pas gruan dhe dy fëmijë, njëri 9 vjeç dhe tjetri vetëm një vjeç.
Disa orë pas ngjarjes, policia italiane arrestoi një 62-vjeçar shqiptar si autor të dyshuar të krimit. I dyshuari u ndalua në banesën e tij, pranë lokalit ku ndodhi vrasja. Raportohet se ai kishte pësuar disa lëndime në fytyrë dhe krahë, duke treguar për një përleshje mes tij dhe viktimës.
Ndërsa policia akuzon 62-vjeçarin për vrasje me dashje, i dyshuari ka mohuar të ketë kryer krimin. Megjithatë, hetuesit janë ende në kërkim të armës së krimit, një kaçavidë, dhe po analizojnë pamjet nga kamerat e sigurisë së zonës për të kuptuar më mirë dinamikën e ngjarjes dhe për të identifikuar nëse ka persona të tjerë të përfshirë.
Dëshmitë e banakierit dhe kontrollet e ushtruara në lokal po hetohen gjithashtu për të zbuluar shkaqet e konfliktit, i cili dyshohet se ka nisur brenda lokalit dhe përfunduar me një tragjedi në rrugë. Vrasja ka tronditur komunitetin lokal dhe mbetet ende e paqartë në detaje.
