Kryetari i Partisë Demokratike, Sali Berisha është shprehur se vendimi për shpalljen e tij “Non Grata” e ktheu atë në skenën politike shqiptare.
Në një intervistë për emisionin “Top Story” në Top Channel, Berisha kritikoi masën e “arrestit shtëpiak” të vendosur ndaj tij, duke e cilësuar si një përpjekje për të kontrolluar opozitën pa prova konkrete. Berisha përmendi edhe gazetarin e Bild, i cili ka deklaruar përfshirjen e ish-zyrtarit amerikan McGonigal në dosjen e tij, duke e cilësuar këtë si një akt që cënon sovranitetin e Shqipërisë, anëtare e NATO-s.
“Nuk ka rëndësi për mua paragjykimi, ka rëndësi që unë të mos tërhiqem kurrë nga një kauzë e drejtë. Nëse dy vjet më parë apo edhe 3 vite, në këtë tezë Berishën e besonin një grup i vogël njerëz, sot ky grup është më i madh. Unë pata rastin në jetë të kem periudha më interesante në jetën e një njeriu, por kur unë u sanksionova për korrupsion, u thashë shqiptarëve dhe botës se ky është një vendim korruptiv. Gazetari i Bild, i cili deklaroi se ekzistojnë dokumente që provojnë se McGonigal është i implikuar në dosjen Berisha. Ky ishte një grusht shteti kundër sovranitetit të një vendi anëtar të NATO. Të gjithë ne që kemi jetuar në diktaturë e dimë se sovraniteti i brendshëm i një vendi diktaturë nuk e ka populli, por e ka në duar diktatori,” tha Berisha.
Më tej, Berisha iu rikthye historisë me Lulzim Bashën, duke thënë se dështoi për t’i marrë kontrollin e opozitës, prandaj e shpallën “Non Grata”.
“Në Shqipëri u godit një njeri që nuk kishte funksione drejtuese në PD por ishte një avokat i qëndrueshëm i interesave të shqiptarëve. Më kthyen në skenën politike. Fakti që menduan ti jepnin vendit im një opozitë kukull, kjo bënte që Sali Berisha të mos pajtohej me këtë dhe i tha vetes 100 herë një thënie të vjetër “Zot më mbro nga miqtë, se nga armiqtë mbrohem vetë”. Pasi dështuan me kontrollin e opozitës zgjodhën arrestin tim pas asnjë provë.”, u shpreh Berisha.
Kur u pyet nga drejtuesja e emisionit Grida Duma për mosbindjen civile, Berisha theksoi se ai ka nisur dhe mbështetur këtë nismë, duke theksuar se shqiptarët po përballen me atë që ai e quajti një “narko-diktaturë”.
“Ajo mosbindje civile ka nisur nga unë, duke lënë modestinë mënjanë dhe si koncept dhe si ide është mbrojtur në mënyrë të fuqishme si kundër është zbërthyer, sepse të ftosh të tjerë për mosbindje civile së pari duhet t’i bindësh ata se motivi qëndron plotësisht, se kauza që mbron është e drejtë dhe ajo ça unë jam përpjekur me mundësitë e mia shqiptarët është se kemi të bëjmë me një narko diktaturë. Gjëra që ti thua shpjegon apo mbron nuk zënë menjëherë fole në mendje dhe ndërgjegjen e të tjerëve kur unë kam informuar shqiptarët dhe vijoj të paraqes se Shqipëria ndodhet në formën më të keqe,” tha Berisha.
