Deputetja e Partisë Socialiste, Briseida Çakërri, ka dalë këtë të martë në mbrojtje të liderit të saj Edi Rama.
Edhe pse shqiptarët janë ngritur në protestë, për të kërkuar dorëheqjen e Ramës, deputetja e PS-së thotë se nuk ka asnjë arsye pse ai të japë dorëheqjen.
Sipas saj, Rama po vijon të zbatojë premtimin kryesor elektoral, për anëtarësimin e Shqipërisë në Bashkimin Europian, ndërsa ka harruar 1000 premtimet e tjera ta pambajtura të liderit të saj.
Sipas Çakërrit, Rama ka shprehur gatishmëri për dialog me përfaqësuesit e protestuesve dhe kaq sipas saj mjafton.
“Nuk ka asnjë arsye që PS edhe Edi Rama të dorëhiqen, kur premtimi kryesor në fushatë ishte pikërisht anëtarësimi në BE. Deri në fund të 2027 Shqipëria do të mbyllë negociatat. Sot jemi në kapitullin 27 që ka po lidhje me mjedisin, që është një nga arsyet kryesore për të cilat nisi ky protestë. Integrimi ishte premtimi kryesor, ku 92 për qind e shqiptarëve e duan integrimin, e thotë barometri i BE. Kjo është fryma e 92 për qind e shqiptarëve. Kryeministri ka dalë që ditët e para dhe u ka shtrirë dorën duke u thënë sillni përfaqësuesin tuaj me kërkesat që ju keni dhe hajde t’i diskutojmë, t’i flasim, çfarë mund të bëjmë më mirë”, u shpreh Çakërri në A2 CNN.
