Liverpool ka marrë një goditje të rëndë, pasi Hugo Ekitike pritet të mbetet jashtë fushave për rreth nëntë muaj pas një dëmtimi shumë serioz.
Sipas raportimit të L’Equipe, sulmuesi francez ka pësuar këputje të tendinës së Akilit në këmbën e djathtë, një dëmtim që i jep fund sezonit të tij dhe që njëkohësisht e lë jashtë edhe Kupës së Botës të kësaj vere.
23-vjeçari u largua me barrelë gjatë ndeshjes së kthimit ndaj PSG-së në çerekfinalet e Champions League, pasi u rrëzua në tokë me shumë dhimbje në pjesën e parë të takimit. Liverpool u mposht 2-0 në atë ndeshje dhe u eliminua me rezultatin e përgjithshëm 4-0.
Ky është një lajm shumë i rëndë për “The Reds”, pasi Ekitike kishte zhvilluar një sezon debutues shumë pozitiv në “Anfield”. Sulmuesi, i transferuar verën e kaluar për 69 milionë paund, kishte regjistruar 17 gola dhe 6 asistime në 45 paraqitje në të gjitha garat.
Edhe trajneri Arne Slot kishte dhënë sinjale shqetësuese menjëherë pas ndeshjes, duke pranuar se pamjet e para të dëmtimit nuk linin vend për optimizëm.
“Mendoj se të gjithë e pamë që nuk dukej mirë. Tani duhet të presim dhe të shohim saktësisht çfarë ka ndodhur, por ishte e qartë se situata nuk dukej aspak e mirë”, deklaroi Slot.
Mungesa e Ekitike i hap probleme serioze Liverpoolit në një moment delikat të sezonit. Tashmë skuadra duhet të reagojë shpejt përpara derbit ndaj Evertonit, ndërsa Slot do të duhet të mbështetet më shumë te Mohamed Salah dhe Cody Gakpo për të ringjallur repartin ofensiv.
