Mëngjesin e kësaj të mërkure, ish-presidenti Ilir Meta ka lënë sërish ambientet e paraburgimit, një ditë pasi i dha lamtumirën e fundit të atit të tij, Rexhep Metaj.
Meta është shoqëruar nga institucionet përkatëse nën masa të posaçme sigurie drejt hotelit “Rogner” në Tiranë, ku po zhvillohet pritja e ngushëllimeve për familjarët dhe të afërmit pas ndarjes nga jeta të babait të tij.
Pritja ka nisur në orën 09:00 dhe pritet të vijojë deri në orën 21:00. Në pamjet e publikuara, kreu i Partisë së Lirisë shihet teksa zbret nga automjeti me të cilin është transportuar drejt ambientit ku po zhvillohen homazhet dhe pritja e ngushëllimeve.
Ilir Meta ka përfituar leje të posaçme nga Struktura e Posaçme kundër Korrupsionit dhe Krimit të Organizuar, që të merrte pjesë në ceremoninë mortore dhe në pritjen e ngushëllimeve të organizuara nga familjarët. Pas afro dy vitesh në paraburgim, kjo është hera e parë që ai del jashtë ambienteve të qelisë, përveç paraqitjeve në seancat gjyqësore.
