Luis de la Fuente nuk e fshehu emocionin pas fitores së madhe të Spanjës ndaj Francës, që i dha “La Rojas” biletën për në finalen e Kupës së Botës pas 16 vitesh.
Trajneri spanjoll u shfaq krenar për lojtarët e tij, duke theksuar se skuadra ka bërë një tjetër hap të madh drejt historisë.
“Është një ndjesi e ngjashme me lumturinë, një krenari e madhe me lojtarë si këta. Kemi hedhur një hap tjetër përpara”, u shpreh De la Fuente.
Për trajnerin e Spanjës, arritja në finalen e Botërorit është një përgjegjësi e madhe, por edhe një privilegj që u takon vetëm skuadrave të veçanta.
“Jam i sigurt se ndiej edhe lehtësim. Është një përgjegjësi e jashtëzakonshme të jesh në finalen e Kupës së Botës. Kjo është vetëm për të zgjedhurit dhe duhet ta pranosh. Kur e nisëm këtë rrugëtim katër vite më parë, qëndruam besnikë ndaj idesë sonë dhe ajo na solli deri këtu”, tha ai.
De la Fuente foli edhe për fitoren ndaj Francës, duke dhënë një deklaratë të fortë për nivelin e skuadrës së tij.
“Kishim folur për këtë. Po përballeshim me një nga skuadrat më të mira në botë, por ata po përballeshin me skuadrën më të mirë. Kjo bën diferencën”, deklaroi trajneri.
Ai vlerësoi përkushtimin, solidaritetin dhe talentin e lojtarëve spanjollë, duke theksuar se kjo skuadër di t’i bëjë gjërat e vështira të duken të lehta.
Në fund, De la Fuente pati edhe një mesazh për tifozët spanjollë.
“Faleminderit për dashurinë dhe mbështetjen. Është nder të jesh spanjoll”, përfundoi ai.
Spanja tashmë është në finalen e Kupës së Botës dhe ëndrra për titullin kampion bote është më e gjallë se kurrë.
