Ish-deputeti socialist, Jurgis Çyrbja prej 20 Tetorit ndodhet në qeli pasi është duke u hetuar për veprat penale “Korrupsion aktiv zgjedhor”, “përkrahje e autorit të krimit” dhe “tregtimi i sekretit shtetëror”.
Emisioni “Në Shënjestër” mbrëmjen e sotme ka folur për krimet zgjedhore, ku janë ndalur pikërisht tek rasti i ish-deputetit socialist, i cili është i përfshirë në zgjedhjet e vitit 2021, ndërsa dyshohet se ka informuar figura të krimit për operacionet policore, duke shmangur arrestimet e tyre në këmbim të votave.
Ndërkohë, nga të dhënat e dosjes hetimore mësohet se një nga kryetarët e grupeve kriminale në zonën e Shijakut, Altin Hajri, ka ndihmuar Çyrbjen për tu zgjedhur deputet.
“Tashi sa e mbylla muhabetin tënd se kam 3 orë me atë, po mos fol me njeri se na prishin punë. Se ja kërkova personalisht. Do ja çoj ashtu tha, normal ti i pesti, Liri i shtati”, është shprehur Altin Hajri.
Gjithashtu, mësohet të jetë përmendur dhe një emër tjetër, i cili është ish-anëtar i bandës së Durrësit, Julian Meçaj, shihet se gjatë gjithë periudhës parazgjedhore të 25 Prill 2021, ka pasur raporte të ngushta me ish-deputetin.
“Ok vëllai. Rrofsh, je i madh. Na ngrite moralin se na kishte ik mendja”, i është drejtuar Çyrbja, Julian Meçajt nga përgjimet në SKYECC.
