Pau Cubarsí, 18-vjeçari i talentuar i Barcelonës dhe i kombëtares spanjolle, ka folur për gazetën AS në një intervistë ekskluzive, ku rrëfen emocionet para El Clásicos së 26 tetorit dhe ambiciet e tij për Kupën e Botës me Spanjën.
Cubarsí, që u bashkua me La Masia-n në vitin 2018 nga akademia e Gironës, tha se ndeshjet ndaj Real Madridit janë gjithmonë “të veçanta dhe të paparashikueshme”. “Të luash në Bernabéu është diçka e jashtëzakonshme, dhe nëse fiton aty, ndjesia është edhe më e bukur,” u shpreh ai.
Mbrojtësi i ri foli edhe për trajnerin Hansi Flick, duke e përshkruar si “miqësor, por kërkues kur duhet”. Ai pranoi se Barcelona duhet të mbajë unitetin në fushë dhe se presioni fillon nga sulmuesit: “Në një skuadër të madhe, të gjithë duhet të mbrojmë — nga sulmi deri në mbrojtje.”
Në jetën personale, Cubarsí jeton në Barcelonë me motrën e tij dhe përpiqet të balancojë futbollin me studimet në administrim biznesi. Ai tha se nuk ka tatuazhe, nuk luan lojëra video dhe preferon një jetë të qetë.
Sa për përballjen me sulmuesit më të fortë, ai pranoi: “Është më e vështirë të ndalosh Mbappén sesa Bellinghamin — ai është shumë i shpejtë dhe godet menjëherë.”
Cubarsí shpreson të jetë pjesë e Kupës së Botës 2026 me Spanjën dhe nuk e fsheh dëshirën për të fituar gjithçka: “Do të ishte diçka madhështore të luaja dhe të konkurronim në një Botëror.”
Pavarësisht moshës së re, shumë e shohin si kapitenin e ardhshëm të Barcelonës. Ai vetë mbetet modest: “Nuk mendoj për këtë tani, por nëse një ditë më japin shiritin, do ta mbaj me krenari.”
