Milan po shqyrton seriozisht mundësinë e shitjes së Samu Chukwueze në merkaton e ardhshme të verës. Anësori nigerian, i cili iu bashkua skuadrës italiane në vitin 2023 për 21 milionë euro, nuk ka arritur t’i përmbushë pritshmëritë dhe roli i tij në skuadër është kufizuar në të qenit lojtar me rotacion.
Kuqezinjtë shpresonin që ish-lojtari i Villarreal-it të bëhej një lojtar kyç në skemën e tyre sulmuese, por paraqitjet e tij kanë qenë larg asaj që pritej. Trajneri Sergio Conceiçao është treguar i qartë me drejtuesit e Milan-it, ku iu ka bërë të ditur se nigeriani nuk bën pjesë në planet e tij për sezonin e ri, ndaj duhet larguar.
Sipas gazetarit Nicolo Schira, Milani është i gatshëm të presë ofertat për sulmuesin, vlera e të cilit në treg ka rënë në 18 milionë euro, sipas Transfermarkt.
Klubi italian dëshiron të rikuperojë një pjesë të investimit të bërë, por është i vetëdijshëm se do ta ketë shumë të vështirë të arrijë të marrë të njëjtën shumë që i ka paguar Villarreal-it. Chukwueze nuk është lojtari i vetëm që do të largohet në verë nga Milan, lista e Conceiçao-s është shumë e gjatë, por që do të zbulohet ditët në vijim.
