Prej disa ditësh, gara për të siguruar një biletë për ndeshjen e shumëpritur Shqipëri–Serbi në “Arenën Kombëtare” më 7 qershor është bërë gjithnjë e më e ethshme. Që nga momenti kur Federata Shqiptare e Futbollit hapi shortin për shitjen e biletave, mijëra tifozë janë përfshirë në përpjekje të vazhdueshme për të siguruar një vend në stadium.
Ndërkohë që në faqen zyrtare të FSHF-së është thuajse e pamundur të gjesh bileta, edhe pse procesi teknikisht është ende i hapur, në faqet alternative të shitjes së biletave ato mund të gjenden, por me çmime të pajustifikueshme. Në platforma si “Viagogo”, një ndër më të njohurat për rishitjen e biletave për ngjarje të ndryshme, përfshirë edhe ato sportive, çmimet nisin nga 170 euro për vendet më të lira, zakonisht pas portave, në zona që në parim ishin të bllokuara nga FIFA.
Çmimet rriten ndjeshëm në sektorët e tjerë të stadiumit, duke arritur deri në mbi 1 600 euro për një biletë në tribunën VIP. Ky spekulim i tejskajshëm, i nxitur nga interesi i jashtëzakonshëm për ndeshjen, ka kapërcyer çdo kufi, duke dëshmuar për një fenomen të shfrytëzimit abuziv të pasionit të tifozëve.
