Presidenti i Federatës Argjentinase të Futbollit, Claudio “Chiqui” Tapia, ka reaguar pas teorive konspirative që shpërthyen në Argjentinë pas humbjes në finalen e Kupës së Botës ndaj Spanjës.
Dhjetëra mijëra tifozë kanë firmosur një peticion për përsëritjen e finales, duke ngritur akuza për arbitrimin dhe duke përmendur presione të jashtme, FBI-në dhe banderolën për ishujt Malvine të shfaqur pas gjysmëfinales me Anglinë.
Megjithatë, Tapia u bëri thirrje tifozëve që të mos ndikohen nga këto pretendime dhe pranoi hapur superioritetin e Spanjës.
“Mos u mashtroni nga gënjeshtrat. Ata ishin superiorë dhe na mundën me meritë. Në sport duhet të dimë t’i pranojmë humbjet me të njëjtin dinjitet me të cilin festojmë fitoret”, shkroi kreu i AFA-s në rrjetet sociale.
Tapia theksoi se humbja në finale është e dhimbshme, por kërkoi respekt për sakrificën e futbollistëve, stafit teknik dhe të gjithë personave që punuan për më shumë se 50 ditë larg familjeve të tyre.
“Mos u ndikoni nga operacionet që kërkojnë vetëm të destabilizojnë. Mjaft u përpoqët të vendosni njerëzit kundër atyre që kanë dhënë kaq shumë për futbollin tonë. Këtu nuk ka justifikime, këtu luhet futboll”, përfundoi ai.
