Eden Hazard, i cili mori pjesë në një ndeshje miqësore mes legjendave të futbollit dhe influencerëve, e cilësoi Real Madrid si skuadrën më të mirë ku ka luajtur ndonjëherë.
Karriera e Hazard-it u dominua nga tre klube: Lille në Francë, Chelsea në Angli dhe Real Madrid në Spanjë. Edhe pse ai pati sukses të madh te dy klubet e para, aventura e tij në Madrid u shoqërua me dëmtime dhe vështirësi për të rikthyer formën, duke mos arritur kurrë nivelin që tregoi në Premier League dhe me Belgjika.
Megjithëse tashmë i tërhequr nga futbolli profesionist, Hazard vazhdon ta shijojë lojën herë pas here. Dhe pavarësisht periudhës së paqëndrueshme te madrilenët, ai e konsideron ende klubin spanjoll si më të mirin ku ka luajtur. Deklarata u bë gjatë një transmetimi “live” të një ndeshjeje miqësore mes legjendave të futbollit dhe influencerëve.
“Jo, Real Madridi është më i miri. Koha ime te Chelsea ishte e jashtëzakonshme, por si klub, Real Madridi është më i miri, numri një. Ëndrra ime ishte të luaja për Real Madridin kur isha i vogël; gjithmonë i thosha babait tim se një ditë doja të luaja për Real Madridin,” u shpreh Hazard, kur u pyet nëse Chelsea ishte skuadra më e mirë ku kishte luajtur.
Eventi “Match for Hope”, i zhvilluar në Katar, përfshiu emra të mëdhenj si Marcelo, Thierry Henry, Franck Ribéry, Gerard Piqué, Tim Cahill dhe Diego Costa, përveç Hazard-it. Skuadra e belgut fitoi ndeshjen me rezultatin 8–7.
Ky event vjetor, i organizuar për të mbështetur fëmijët dhe të rinjtë pa akses në arsim në disa vende të Lindjes së Mesme, Azisë dhe Afrikës, mblodhi rreth 10 milionë euro, ndërsa mbi 40 mijë spektatorë ndoqën nga afër disa prej lojtarëve më të mëdhenj në botë.
