Të gjithë u marrosën pas anijes luftarake amerikane USS Mount Whitney (LCC-20) që u ankorua që në datën 9 shtator në Portin e Porto Romanos në Durrës. Presidenti, kryetari i Kuvendit, ministrat e mbrojtjes dhe të jashtëm patën takime të veçanta me komandantin e anijes.
Siç rezulton nga një kërkim i thjeshtë se çfarë përfaqëson kjo anije luftarake që vendoset në Itali dhe më pas shëtit në disa vende, duke përmendur Greqinë, Libinë (vizita të planifikuara), dokumentet tregojnë se ishte vendosur për shkatërrimin e saj në vitin 2026, pra pas një viti. Por ky plan paraprak i zbuluar nga “Star and Stripes”, është shtyrë edhe për një vit dhe data më e afërt është parashikuar 2027.
Shkak janë bërë kostot e saj të larta. Në dokumentet buxhetore të US Navy të vitit 2023, ishte propozuar që Mount Whitney të mos funksiononte më në 2026 duke i kursyer ushtrisë navale amerikane 179,7 milionë dollarë në vit. Kritikët thanë se anija kishte kapacitete unike, sidomos për bashkëkontrollin USA/NATO që do të ishte e vështirë të zëvendësohej si rol në një anije tjetër.
Ndërkohë në Majin 2025 doli në dritë një fakt i ri se procesi i nxjerrjes së saj jashtë përdorimit do të jetë viti 2027.
Zyrtarët në bordin e anijes mendojnë se ajo mund të shërbejë edhe për një dekadë tjetër duke i bërë disa modifikime.
Anija ka moshën 54 vjeçare, u ndërtua në 8 janar 1969 dhe një vit më vonë doli në patrullim.
Kjo anije për shqiptarët ka një rëndësi të veçantë. Pas viteve ’90 ka luajtur një rol kyç në konfliktin e Bosnjës dhe operacionet në Kosovë. Ndërsa në vitet ’70-90 ka mbështetur operacionet e flotës së NATO dhe USA në Mesdhe gjatë luftës së ftohtë.
Vitet e fundit misioni i saj ka qenë pjesëmarrje e rregullt në ushtrimet e NATO-s, duke forcuar prezencën amerikane në rajonin e Europës, sidomos pas rritjes së tensioneve nga ana e Rusisë.
Mout Whitney është një ndër anijet më të vjetra aktive të flotës amerikane.
