Në një deklaratë për mediat pas mbylljes së procesit të votimit, kreu i KQZ-së, Ilirjan Celibashi, tha se zgjedhjet e pjesshme në pesë bashki të vendit janë zhvilluar në mënyrë të qetë dhe të rregullt, pa shkelje që mund të cënonin standardet demokratike të procesit.
“Nuk ka ndonjë ndryshim të madh nga çfarë u raportua në komunikimet e mëparshme, nuk kemi evidentuar problematika që kanë cenuar standardin e procesit të votimit. Procesi i identifikimit është kryer në 100% të qendrave të votimit përmes pajisjeve elektronike të identifikimit,” tha Celibashi.
Ai shtoi se procesi i dorëzimit të materialeve zgjedhore ka nisur, ndërsa disa qendra janë ende në fazën e transportit të kutive të votimit. Sipas tij, shumë shpejt do të nisë edhe procesi i numërimit të votave.
Gjatë komunikimit me gazetarët, kreu i KQZ-së u pyet për pjesëmarrjen e ulët të votuesve, veçanërisht në bashkinë e Vlorës, ku në votime morën pjesë vetëm 12% e qytetarëve me të drejtë vote. Celibashi theksoi se një pjesëmarrje e ulët nuk e bën procesin ilegjitim.
“Nëse 12% e qytetarëve të Vlorës kanë dashur të marrin pjesë, do të thotë se ai është vullneti i tyre, por kjo nuk i bën zgjedhjet ilegjitime në mënyrë absolute. Ka vende që kanë një kufi minimal të pjesëmarrjes për të konsideruar zgjedhjet të vlefshme, dhe ka vende që nuk e kanë një rregull të tillë,” shpjegoi ai.
Në fund, Celibashi u ndal edhe tek vlerësimi i përgjithshëm i procesit zgjedhor, duke e cilësuar atë si të suksesshëm dhe të krahasueshëm me standardet ndërkombëtare.
“Suksesi i KQZ matet nga mënyra se si organizohen zgjedhjet në aspektin teknik dhe profesional. Edhe këto zgjedhje, ashtu si ato të 11 majit 2025, u përgatitën shumë mirë nga pikëpamja logjistike dhe teknike. Profesionalisht, janë të organizuara shumë mirë, të krahasueshme me standardet më të mira ndërkombëtare,” përfundoi Celibashi.
