Këshilli i Lartë i Prokurorisë, KLP çeli sot garën për kreun e ri të Prokurorisë së Posaçme kundër Korrupsionit dhe Krimit të Organizuar, SPAK, pasi mandati i kreut aktual, Altin Dumani përfundon më 18 dhjetor.
Të pranishëm në mbledhjen e KLP-së ishin edhe përfaqësuesit e ambasadës amerikane.
KPL vendosi që kandidatëve t’u lihet një afat prej 3 javësh për të paraqitur dokumentacionin.
Sokol Stojani, si kryetar i Komisionit të Karrierës propozoi që prokurorëve të posaçëm t’u lihet një afat prej 2 javësh për të aplikuar. Ndërsa anëtari Vate Staka kërkoi që afati të ishte 3 javë.
Në përfundim, anëtarët e KLP-së vendosën që kandidatëve t’u lihej afat deri më datën 8 Tetor për të shprehur interesin e tyre për postin.
Të drejtën për tu zgjedhur në këtë post e kanë vetëm prokurorët e prokurorisë së posaçme, me përjashtim të Dumanit, të cilit ligji ia ndalon të kandidojë dy herë radhazi.
Dumani është drejtuesi i dytë i Prokurorisë së Posaçme që u zgjodh pas përfundimit të mandatit të Arben Krajës, i cili ishte i pari pas krijimit të Prokurorisë së Posaçme.
Pas lënies së këtij posti ai do të ushtrojë detyrën si prokuror i posaçëm i kësaj strukture deri në përfundimit të mandatit 9 vjeçar.
Kandidatët duhet të plotësojnë kriteret e mëposhtme
a)Eksperiencen ne ndjekjen e çeshjeve sensitive të korrupsionit dhe krimit të organizuar;
b) Eksperiencën dhe aftësitë në organizimin dhe drejtimin e një strukture;
c) Eksperiencën në hartimin e miratimin e rregulloreve administrative;
ç) Eksperiencën në çështje të cilat kanë marrë vëmendje të lartë publike, dhe ndërveprim me median;
d) Aftësitë në drejtimin efektiv të burimeve njerëzore,
dh) Vizionin ose planin e besueshëm për organizimin e Prokurorisë së Posaçme si një institucion funksional dhe efektiv,
e) Imazhin publik të karrierës së tij/saj si prokuror.
Dokumentacioni i aplikimit do të paraqitet në rrugë postare ose dorazi pranë zyrës së protokollit të Këshillit.
