Manchester United është shumë pranë rikthimit në Champions League, pas fitores 2-1 ndaj Brentford të hënën në Premier League.
Casemiro dhe Benjamin Sesko ishin protagonistët kryesorë për “Djajtë e Kuq”, që mbeten në vendin e tretë në tabelë. United tashmë ka një avantazh prej 11 pikësh ndaj Brighton të vendit të gjashtë, duke bërë pothuajse të sigurt një vend në pesëshen e parë dhe rikthimin në elitën e futbollit evropian për herë të parë pas tre vitesh.
Casemiro zhbllokoi ndeshjen në minutën e 12-të, duke shënuar me kokë golin e tij të katërt në tetë ndeshjet e fundit. United e nisi takimin me ritëm të lartë, ndërsa Amad Diallo humbi një rast të pastër që në minutën e dytë, pas një aksioni të bukur nga Kobbie Mainoo. Pak më vonë, edhe Harry Maguire iu afrua golit, por goditja e tij me kokë u ndal pranë vijës fatale nga Caoimhin Kelleher.
Megjithatë, vendasit rrezikuan në disa momente dhe portieri Senne Lammens u detyrua të bënte dy pritje të rëndësishme, duke shmangur dy autogola të mundshëm nga Ayden Heaven.
Në fundin e pjesës së parë, Sesko dyfishoi avantazhin për Manchester United, duke finalizuar lehtësisht pas një pasimi perfekt nga Bruno Fernandes. Kapiteni i United arriti kështu në 19 asistime këtë sezon, vetëm një larg rekordit të përbashkët të Premier League, që mbahet nga Kevin De Bruyne dhe Thierry Henry.
United e kontrolloi ndeshjen për pjesën më të madhe të fraksionit të dytë, por goli i Mathias Jensen në minutën e 87-të e bëri fundin e takimit më të tensionuar. Megjithatë, skuadra e siguroi fitoren dhe hodhi një hap shumë të madh drejt rikthimit në Champions League.
