Koha e shpalljes së armëpushimit, shkurtësia dhe natyra e tij e papritur, e njëanshme – nëse aleatëve të Ukrainës u duhej një tjetër provë e qasjes cinike të Rusisë ndaj paqes, shpallja e armëpushimit aktual të Pashkëve u dha atyre pikërisht këtë.
Armëpushimi u shpall vetëm disa orë pasi Sekretari amerikan i Shtetit Marco Rubio dhe shefi i tij, Presidenti Donald Trump, thanë se u duhej urgjentisht një shenjë në ditët në vijim se Kremlini ishte serioz për paqen. Për mbështetësit rusë, njoftimi i së shtunës nga presidenti Vladimir Putin mund të jetë dukur si një shenjë e vullnetit të mirë ndaj Trump, por vetë njoftimi ka aq shumë të meta praktike sa që është pothuajse me siguri një përpjekje për të mbështetur tezën e rreme të Putinit se Kievi nuk dëshiron të ndalojë luftën.
Sigurisht që do të ketë dezinformata që do t’i ngatërrojnë ushtarët – si të zbatojnë armëpushimin, si të raportojnë apo të përgjigjen ndaj shkeljeve, madje edhe çfarë të bëjnë kur të përfundojë.
Është e mundur që ky moment të jetë një demonstrim i rrallë që të dyja palët mund të ndalojnë për pak kohë dhunën. Por ka shumë më tepër gjasa që të dyja palët të shfrytëzojnë shkeljet dhe konfuzionin për të treguar se tjetrës nuk duhet t’i besohet. Autoritetet ukrainase njoftuan të shtunën në mbrëmje me orën lokale se sulmet ruse në fushën e betejës kishin vazhduar.
Moska morri një vendim të ngjashëm të njëanshëm në janar 2023, kur bëri thirrje për një ditë paqeje në mënyrë që të krishterët ortodoksë të mund të festonin Krishtlindjet, një lëvizje që u hodh poshtë në atë kohë nga Kievi dhe udhëheqësit perëndimorë si një pauzë strategjike për përfitime ushtarake.
Një armëpushim i vërtetë kërkon negociata me kundërshtarin dhe përgatitje që ai të realizohet me të vërtetë. Ky nxitim i papritur duket të jetë një lëvizje e krijuar vetëm për të kënaqur kërkesën e Shtëpisë së Bardhë për disa shenja se Rusia është gati t’i japë fund luftës.
Armëpushimi ka të ngjarë t’i shtojë interpretimit herë pas here pro-Moskës të Trump për konfliktin. Por mund të krijojë gjithashtu dhe probleme për Ukrainën nëse, ndoshta, më vonë akuzohet për shkelje të asaj që Uashingtoni mund ta shohë si gjest të vullnetit të mirë të Rusisë.
Kjo ndërprerje e shkurtër, ndoshta simbolike, pothuajse me siguri e njëanshme dhe praktikisht e pazbatueshme e luftës trevjeçare, ka të ngjarë të dëmtojë më shumë rolin e diplomacisë sesa ta ndihmojë atë në muajt e ardhshëm. /CNN
