Kryeministrja italiane Giorgia Meloni ka qenë një nga mbështetëset kryesore të një politike më të ashpër ndaj emigracionit të parregullt dhe kthimit të migrantëve.
Por tani, Italia po përballet me kërkesa nga një numër në rritje i vendeve të BE-së që të rikthejë azilkërkuesit që kanë hyrë fillimisht në territorin evropian përmes saj, transmeton Telegrafi.
Irlanda u bë të dielën vendi më i fundit që i kërkoi Italisë të marrë përgjegjësinë për azilkërkuesit në bazë të parimit të vendit të parë të hyrjes. Ajo iu bashkua Gjermanisë, Zvicrës, Austrisë, Finlandës, Suedisë dhe Holandës.
Kjo situatë lidhet me Paktin e ri të BE-së për Migracionin dhe Azilin, i cili hyri në fuqi në qershor 2026 dhe rikthen në qendër një nga parimet e sistemit të Dublinit: vendi ku një shtetas jashtë BE-së hyn fillimisht dhe kërkon mbrojtje duhet të jetë përgjegjës për shqyrtimin e kërkesës së tij.
Ironia për Melonin është se qeveria e saj kishte mbështetur pikërisht këtë parim për të forcuar pozitën e vendeve të para të hyrjes. Në vitet e fundit, Italia kishte pezulluar në mënyrë të njëanshme pranimin e transferimeve sipas rregullave të Dublinit, duke argumentuar se nuk kishte kapacitetet e nevojshme.
Tani, me rregullat e reja, vendet e tjera të BE-së kanë një mekanizëm më të thjeshtë për t’i kthyer azilkërkuesit drejt vendit të parë të hyrjes.
Meloni e kishte cilësuar më herët paktin e ri si një “pikë kthese pozitive” për Italinë, duke argumentuar se rregullat e reja do të mbronin më mirë vendet e para të hyrjes dhe do të lehtësonin kthimet.
Por sot Roma po përballet me presionin e kundërt.
Në vitin 2026, vetëm 8,878 migrantë pritet të zhvendosen nga vendet nën presion migrator – përfshirë Italinë, Spanjën, Greqinë, Qipron dhe Maltën – drejt vendeve të tjera të BE-së. Kjo është një shifër shumë e vogël krahasuar me numrin e përgjithshëm të mbërritjeve.
Përplasja po rikthen edhe ndarjen tradicionale brenda BE-së mes vendeve të vijës së parë, si Italia dhe Greqia, dhe vendeve të destinacionit, si Gjermania dhe Austria.
Në Romë, ministri i Brendshëm Matteo Piantedosi pritet të diskutojë situatën me homologët e vendeve MED5 – Qipro, Greqi, Itali, Maltë dhe Spanjë.
Ndërkohë, qeveria italiane vazhdon të akuzojë organizatat joqeveritare gjermane që operojnë në Mesdhe se nxisin migracionin e parregullt.
Çështja pritet të bëhet edhe më e ndjeshme politikisht, pasi migracioni po shndërrohet në një nga temat kryesore të zgjedhjeve të ardhshme në disa vende të BE-së, ndërsa partitë e djathta radikale po fitojnë terren.
