Portugalia fitoi 2-1 ndaj Kilit në miqësoren e zhvilluar në Lisbonë, me Bruno Fernandes që konfirmoi edhe një herë peshën e tij të madhe në skuadrën e Roberto Martinez para Botërorit.
Ndeshja nuk ishte e lehtë për portugezët, sidomos pas kartonit të kuq të Rafael Leao në fundin e pjesës së parë. Anësori i Milanit u përfshi në një përplasje të panevojshme pranë vijës anësore dhe u ndëshkua direkt me të kuq, ashtu si Ivan Ramon te Kili.
Në pjesën e dytë, ndryshimet e Martinez dhanë efekt. Ruben Neves dha një pasim të shkëlqyer për Gonçalo Guedes, i cili zëvendësoi Cristiano Ronaldo dhe zhbllokoi rezultatin me një finalizim të bukur.
Pak më vonë, Bruno Fernandes dyfishoi avantazhin me një goditje të saktë nga jashtë zone, pas një aksioni të nisur nga Guedes dhe një pasimi të zgjuar të Francisco Conceição.
Kili shënoi në fund me Lucas Cepeda, por Portugalia arriti të ruajë avantazhin dhe të marrë fitoren në testin e parafundit para Botërorit.
Ndërkohë, Cristiano Ronaldo nuk la gjurmë në ndeshje, ndërsa Bruno Fernandes ishte lojtari që mori më shumë vëmendje me paraqitjen e tij vendimtare.
