Mes emocioneve djemtë kuqezinj arritën që mbrëmjen e së martës të “thyenin mallkimin” ndaj Letonisë, duke marrë fitoren e parë historike ndaj tyre, pas gjashtë ndeshjesh që kishin prodhuar vetëm barazime.
Në një ndeshje të vlefshme për kualifikueset e Botërorit, çunat e Silvinjos “shkundën” rrjetën e kundërshtarit dhe triumfuan me rezultatin 1-0 .
Goli që vendosi fatin e sfidës erdhi në minutën e 25-të, kur Kristjan Asllani u tregua i saktë nga pika e bardhë e penalltisë, duke i dhënë avantazhin Shqipërisë dhe tre pikë jetike drejt Botërorit.
Pas përfundimit të ndeshjes rrugët e kryeqytetit u mbushën plot me tifozë të cilët kënduan dhe kërcyen. Ndërkohë që ministri Taulant Balla, i cili është parë shpesh pranë futbollistëve tanë, ka takuar Armando Brojën për të cilin ky 10 shtator është mjaft i rëndësishëm.
Ai feston ditëlindjen e 24-të dhe ministri e ka uruar personalisht dhe publikisht në rrjetet e tij sociale. Balla shihet krah Brojës, ndërkohë që fotos së bërë me të i ka bashkangjitur në “Facebook” edhe urimin për ditëlindje: “Gëzuar ditëlindjen Armando, Dëshira është goli me Serbinë!”.
Kombëtarja shqiptare fitoi 1-0 ndaj Letonisë në “Air Albania”, në ndeshjen e vlefshme për kualifikueset e Kupës së Botës 2026. Kuqezinjtë dominuan takimin dhe siguruan tri pikë të rëndësishme falë golit të Kristjan Asllanit.
Trajneri Silvinjo e nisi ndeshjen me këtë formacion titullar: Strakosha (GK), Gjimshiti (C), Ajeti, Hysaj, Mitaj, Shehu, Laçi, Asllani, Bajrami, Broja, Manaj.
Shqipëria e nisi vrullshëm takimin dhe që në minutat e para kërkoi golin. Në minutën e 9-të Hysaj krosoi nga e djathta, por tentativa me kokë e Laçit përfundoi jashtë. Në të 19-ën provoi Broja me një top të rrezikshëm në zonë.
Në minutën e 23-të, pas një aksioni të bukur mes Bajramit dhe Laçit, Shqipëria fitoi një penallti. Asllani u tregua i saktë nga pika e bardhë dhe kaloi kuqezinjtë në avantazh.
Kuqezinjtë vijuan të rrezikonin dhe në të 30-ën Manaj ishte pranë golit të dytë, por goditja e tij kaloi ngjitur me shtyllën. Pjesa e parë u mbyll 1-0.
Në fillim të fraksionit të dytë, Laçi provoi pas një harkimi të mirë të Hysajt, por gjuajtja e tij përfundoi mbi traversë.
Një rast i artë u regjistrua në minutën e 56-të, kur kapiteni Gjimshiti nuk arriti të shënonte përballë portierit. Në të 67-ën ishte Bajrami që rrezikoi me një goditje të fortë, por u ndal nga portieri i Letonisë.
Në pjesën e dytë Silvinjo hodhi në fushë edhe Hoxhën, Dakun, Pajazitin dhe Kumbullën. Në fund, Shqipëria arriti të mbante avantazhin dhe e mbylli ndeshjen me fitoren 1-0. Kuqezinjtë ngjiten në vendin e dytë të Grupit K me 8 pikë. Ndeshja e radhës kualifikuese do të luhet ndaj Serbisë më 11 tetor.
