Kryeministri britanik Keir Starmer ndodhet në një vizitë dy ditore në Tiranë. Ai zhvilloi një takim me Presidentin Begaj dhe Kryeministrin Rama më pas doli në një deklaratë për shtyp me homologun shqiptar. U shpreh se kanë firmosur deklaratën ndërmjet Këshillit të Ministrave të Republikës së Shqipërisë dhe Qeverisë së Mbretërisë së Bashkuar të Britanisë së Madhe dhe Irlandës së Veriut, në lidhje me eksportet në fushën e mbrojtjes dhe bashkëpunimin industrial. Vlerësoi punën me autoritetet shqiptare për ndaljen e emigracionit.
“Jam shumë i kënaqur që të vij në Shqipëri dhe të organizoj këtë takim para samitit. Përgëzime, urime për fitoren zgjedhore. Kjo është vërtetë gjë e madhe për të hapur me Shqipërinë kapitullin e radhës mes dy vendeve. Kjo është një mundësi për të parë nga afër si po punojnë dy vendet tona. Sot isha në portin e Durrësit pashë përpjekjen për të goditur krimin ndërkufitar. Kufijtë e sigurtë e vendit tonë janë jetike.
Njerëzit meritojnë një sistem emigracioni të drejtë që vendos logjikën dhe kontrollin dhe u jam mirënjohës për përpjekjen e guximshme për cështjen e emigracionit. Ulja e gomoneve ka qenë e konsiderueshme. Taks Forca jonë ka përveshur mëngët, ka punuar, ka ecur përpara për të frenuar emigracionin e paligjshëm. Kemi edhe marrëveshjen për transferimin e personave të dënuar. Mesazhi është që Europa është e sigurtë” tha ai.
I pyetur nëse ka diskutuar me kryeministrin Edi Rama për dërgimin e azilantëve të dëbuar në Shqipëri, si rasti i Italisë, Keir Starmer u shpreh se “Ajo që diskutuam ishte efektiviteti i atyre bashkëpunimeve që kemi bërë për këto dy tre viteve që kanë çuar në uljen dramatike të shifrave në 94% dhe si kjo punë mund të shtrihet në vende të tjera të rajonit.
Po kështu diskutuam duke dalë nga takimi, si të punojmë për aktivitetet e tjera kriminale ndërkufitare. Ky model i vecantë ka qenë më efektivi, kryeministri dhe unë mendojmë njëlloj, nuk preferojmë të flasim për problemin por të punojmë dhe ta zgjidhim atë. Kjo është një punë që është shembull për të tjerët” tha Starmer.
“Replikimi i modelit që kemi me Italinë, unë e kam thënë që ky është një model që kërkon kohën e vet për t’u testuar dhe nëse funksionon mund të replikohet por jo në Shqipëri, por vende të tjera të rajonit. Nuk ka arsye pse të mos ketë disponim nga vendet e tjera. Ne kemi diskutuar edhe për samitin që do të bëhet në Londër në Tetor për Procesin e Berlinit” tha Edi Rama.
