Briseida dhe Jori, dy konkurrentë të njohur të “Big Brother VIP”, kanë bërë deklarata të forta pas eliminimit të tyre nga shtëpia e xhuxhave. Pas katër ditësh qëndrimi në këtë ambient, ata kanë ngritur dyshime serioze për transparencën e procesit të televotimit dhe kanë akuzuar produksionin për manipulim dhe inskenim të ngjarjeve.
Në një video të publikuar në internet, çifti i eliminuar shpërtheu duke thënë se televotimi nuk ka pasur ndikim në vendimin final. Sipas tyre, “produksioni vendos çdo gjë” dhe televotimi është thjesht një fasadë për t’i dhënë publikut iluzionin e një procesi të hapur dhe të ndershëm. “Mos harxhoni lekët kot duke votuar, produksioni vendos çdo gjë. Ajo që shihet në TV nuk ka lidhje me realitetin,” thanë ata, duke shtuar se gjithçka që ka ndodhur në shtëpi ishte e inskenuar dhe e kontrolluar nga ekipi i produksionit.
Briseida dhe Jori e përshkruan eksperiencën e tyre në shtëpinë e “Big Brother VIP” si një moment ndryshe, por të mbushur me padrejtësi dhe manipulime. Ata theksuan se ishin të udhëzuar se çfarë të thoshin dhe çfarë të bënin, duke sugjeruar se çdo veprim dhe fjalë ishte pjesë e një skenari të mirë-organizuar.
“Populli është i zgjuar dhe e kupton çfarë ndodh. Ne e provuam këtë eksperiencë dhe jemi mirënjohës për mbështetjen, por gjithçka brenda ishte një skenar,” përfunduan ata.
Ndërkohë, produksioni i “Big Brother VIP” nuk ka dhënë ende asnjë reagim zyrtar në lidhje me këto akuza, duke mbajtur qëndrimin e tij të heshtur.
