Mbi 1.24 milionë tifozë pritet të udhëtojnë drejt Shteteve të Bashkuara vitin e ardhshëm për të ndjekur kampionatin botëror të futbollit, që do të zhvillohet nga 11 qershori deri më 19 korrik 2026. Sipas një analize të ‘Tourism Economics’ në bashkëpunim me Oxford Economics, hyrjet e të huajve në SHBA do të rriten me 60%, duke sjellë gjithashtu një rritje prej 25% në të ardhurat e hoteleve.
Një nga aspektet më të dukshme të këtij eventi është rritja e numrit të vizitorëve, e cila do të përfshijë rreth 742 mijë udhëtime që ndryshe nuk do të ishin realizuar pa botërorin. Rreth 40% e tifozëve në stadiume do të jenë të huaj, duke e theksuar ndikimin e madh që ky turne ka në ekonominë e qyteteve pritëse. Qytete si New York, Dallas dhe Miami, që do të organizojnë më shumë ndeshje, pritet të përfitojnë më shumë, me një rritje të të ardhurave për akomodim prej 2.5-7% gjatë qershorit dhe një rritje vjetore prej 1-5% për muajin korrik.
Kampionati i vitit 2026 do të jetë përshtatja më e madhe ndonjëherë e këtij eventi, duke përfshirë për herë të parë 48 skuadra. SHBA do të presë 78 nga 104 ndeshjet e planifikuara, me ‘MetLife Stadium’ në New Jersey që do të presë finalen. Vendet me numrin më të madh të tifozëve, si Argjentina, Brazili, Franca dhe Anglia, pritet të kenë një ndikim të rëndësishëm në ekonominë e qyteteve amerikane.
Një faktor tjetër interesant është se suksesi i papritur i skuadrave më të vogla mund të sjellë rritje të mëtejshme të vizitorëve nga ato vende, duke e bërë evenen më tërheqës. Për të sqaruar detajet e konkurrencës dhe qytetet që do të presin skuadrat më popullore, FIFA do të organizojë një short më 5 dhjetor. Edhe pse emrat e disa skuadrave janë ende të panjohur, FIFA ka raportuar për shitje të mbi 1 milion biletave, me shifra të reja që do të publikohen më vonë.
