Kupa e Botës 2026 është gati të nisë dhe këtë herë hapja e turneut do të jetë historike, ashtu si vetë formati i kompeticionit. Për herë të parë, Botërori do të zhvillohet në tri shtete pritëse: Meksikë, Shtetet e Bashkuara të Amerikës dhe Kanada, ndërsa do të marrin pjesë 48 kombëtare.
Turneu do të nisë më 11 qershor, me ndeshjen hapëse mes Meksikës dhe Afrikës së Jugut, por spektakli do të fillojë edhe më herët me koncertet dhe ceremonitë zyrtare të përgatitura nga FIFA.
Më 10 qershor do të zhvillohen “FIFA Countdown Concerts”, një festë muzikore në formë numërimi mbrapsht, me tre koncerte të lidhura mes Meksikës, SHBA-së dhe Kanadasë. Në skenë do të ngjiten deri në 15 artistë ndërkombëtarë, mes tyre Andrea Bocelli, Belinda, Bryan Adams, Wyclef Jean, Ava Max, Davido dhe Major Lazer.
Ceremonia kryesore e hapjes do të mbahet më 11 qershor në stadiumin “Azteca” në Mexico City, pak para ndeshjes Meksikë-Afrikë e Jugut. Ajo pritet të zgjasë rreth 90 minuta dhe do të ketë në qendër këngën promovuese të Botërorit, “Dai Dai”, nga Shakira dhe Burna Boy.
Në ceremoninë e Meksikës pritet të performojnë emra si Alejandro Fernández, Belinda, Danny Ocean, J Balvin, Lila Downs, Los Ángeles Azules, Manna dhe Tyla.
Një ditë më pas, më 12 qershor, festa do të zhvendoset në Kanada, përpara ndeshjes Kanada-Bosnje dhe Hercegovinë në Toronto. Në këtë ceremoni do të jenë të pranishëm artistë si Alanis Morissette, Alessia Cara, Jessie Reyez, Michael Bublé, Nora Fatehi dhe të tjerë.
Po më 12 qershor do të zhvillohet edhe ceremonia hapëse në Shtetet e Bashkuara, në “SoFi Stadium” të Los Angeles, përpara sfidës SHBA-Paraguaj. Në skenë pritet të ngjiten Katy Perry, Future, Anitta, LISA, Row dhe Tyla.
Me tri ceremoni, koncerte ndërkombëtare dhe një format të zgjeruar me 48 skuadra, Botërori 2026 pritet të nisë me një spektakël të madh, duke i dhënë start një prej edicioneve më të veçanta në historinë e futbollit.
