Bonusi i pranverës nuk u shpërnda në shkurt siç ishte njoftuar nga qeveria, por do të jepet për të moshuarit duke filluar nga 1 marsi. Sipas shpjegimit të qeverisë, vonesa është shkaktuar nga procedurat e brendshme.
Kryeministri Rama kishte deklaruar më parë se pensionistët nuk do të presin për përfundimin e zgjedhjeve, pasi do të marrin bonusin që në shkurt, dhe e konsideronte këtë si një festë të demokracisë. Megjithatë, deri tani, shpërndarja e bonusit nuk ka nisur.
Pensionistët do të mund ta tërheqin shpërblimin në të njëjtën ditë që do të marrin edhe pensionin e tyre të përmuajshëm, duke filluar nga 1 marsi. Ata që përfitojnë një pension deri në 20 mijë lekë do të marrin një shtesë prej 10 mijë lekësh, ndërsa ata që marrin më shumë se 20 mijë lekë, do të përfitojnë edhe 5 mijë lekë të tjera si bonus.
Qeveria ka ndryshuar për herë të tretë buxhetin e vitit të kaluar, duke shpërndarë një mbështetje prej 6.3 miliardë lekësh për të moshuarit.
