Më 26 nëntor, të martë, Partia Demokratike do të zhvillojë protestën e radhës. Protesta u lajmërua nga kreu i opozitës, Sali Berisha, ndërsa kryetari i Këshillit Kombëtar të PD-së, Edi Paloka ka zbardhur skenarin që do të ndiqet nga protestuesit.
I ftuar në emisionin “Kjo javë”, Paloka tha se protesta do të jetë mosbindje civile dhe do të ketë bllokim të të gjitha rrugëve në Tiranë.
Ai tha se qytetarët dhe mbështetësit e opzitës do të marshojnë në akset Brenda kryeqytetit me qëllim “paralizimin” e qarkullimit .
“Sot do mblidhemi për protestën. Dua të jap një lajm: Protesta e radhës do jetë bllokim total i Tiranës, i rrugëve, i trafikut në Tiranë, në datën 26. Marshim në Tiranë i qytetarëve. Ky do të jetë qëllimi. Do vuajnë qytetarët, por më mirë të vuajnë një ditë, 1 javë, por do të shpëtojnë nga vuajtja që zgjat prej 12 vitesh dhe që mund të zgjasë akoma nëse nuk reagojmë.
Nga ndërkombëtarët ka një ndryshim në qëndrime. E mbani mend dikur që sa herë njoftonim një protestë vinin reagimet, përjashto njoftimet rutine të ambasadës së USA, por nga shigjetat që vinin…këtë kemi kohë që nuk e dëgjojmë më. Kemi dy rezoluta që janë shumë të rëndësishme, PPE drejton Europën, ka rëndësinë e vet cilësore“, tha ai.
Opozita ka thirrur mbështetësit në protestë kombëtare në Tiranë të martën e 26 nëntorit. Protesta është lajmëruar në orën 17:00.
