“Ka ardhur koha për një shqiptar në Kongresin Amerikan”, kështu është shprehur me bindje Robert Lulgjuraj, biri i Malësisë me rrënjë të thella shqiptare, që tashmë synon të hyjë në historinë politike të Shteteve të Bashkuara.
Prokurori shqiptaro-amerikan dhe anëtari i Partisë Republikane ka shpallur zyrtarisht kandidaturën për Kongresin e SHBA-së, duke synuar të përfaqësojë Distriktin e 10-të të Michigan-it në zgjedhjet e vitit 2026.
Familja Lulgjuraj e ka origjinën nga viset shqiptare të Malit të Zi. Gjyshërit dhe prindërit e tij emigruan në Amerikë në vitin 1960, për t’i shpëtuar komunizmit dhe persekutimit fetar. Ata u vendosën në Detroit, ku filluan një jetë të re, të mbushur me punë të ndershme dhe shumë sakrifica, si shumë familje shqiptare të asaj kohe.
Gjyshja e Robertit punonte si pjatalarëse, ndërsa nëna e tij si kameriere, punë që e vazhdon edhe sot.
“Gjyshërit e mi erdhën për t’i shpëtuar komunizmit, persekutimit fetar dhe tiranisë. Katolicizmi dhe mundësia për të ushtruar fenë e tyre ishin një pjesë e madhe e arsyes pse ata emigruan, si dhe mundësia për punë. Gjyshi im ishte punëtor në Chrysler në Detroit, dhe gjyshja ime punonte si pjata larëse. Ndërsa mamaja ime, edhe tani që po flasim, punon si kameriere, dhe babai im është punëtor mirëmbajtjeje. Prindërit e mi sakrifikuan pa masë për mua, dhe për këtë arsye unë dua të jap diçka në këmbim, për t’i falënderuar ata, për të falënderuar vendin tim dhe për të shërbyer komunitetit tim”, ka rrëfyer Lulgjuraj në një intervistë të dhënë më herët.
Sot, ky djalë që lindi dhe u rrit në Sterling Heights është krenar për rrënjët e veta shqiptare. Ai nuk ka reshtur asnjëherë së e treguari me zë të lartë se nga vjen dhe cilat janë vlerat që e kanë formuar.
Roberti u rrit në një familje të përkushtuar ndaj besimit katolik. Është pjesëtar aktiv i Famullisë së Shën Palit në Michigan dhe i përkushtuar ndaj vlerave tradicionale familjare. Arsimin e filloi në shkollën publike “Grissom” në Sterling Heights, për ta vijuar më pas në shkollën prestigjioze katolike për djem “Brothers Rice”.
Në vitin 2015 u diplomua për Studime të Biznesit dhe Shkenca Humane, ndërsa në vitin 2020 mori doktoraturën në drejtësi me nderime të larta nga shkolla e drejtësisë “Mercy”. Gjatë viteve të studimeve shërbeu si Kryetar i të Rinjve të Partisë Republikane në qarkun e Macomb-it, duke dëshmuar që në moshë të re pasionin për politikën dhe drejtësinë.
Pas studimeve, ai punoi si avokat në Detroit, ku trajtoi çështje të rënda penale që përfshinin vjedhje, tentativa për vrasje dhe trafikim të lëndëve narkotike. Më vonë, si prokuror në Wayne County dhe Macomb County, Lulgjuraj ka ndjekur mbi 2,000 raste penale, përfshirë edhe dosje të krimit të organizuar dhe dhunës së rëndë. Ai gjithashtu udhëhoqi njësinë për optimizimin e provave digjitale, një iniciativë që ngriti nivelin e efikasitetit në sistemin e drejtësisë amerikane.
Për kolegët dhe komunitetin, Robert Lulgjuraj nuk është një njeri i fjalëve boshe, por i veprave. Një profesionist i përgatitur, me vizion të qartë dhe ndjenjë të thellë përgjegjësie qytetare. Ai e sheh ligjin jo si armë të pushtetit, por si mburojë të qytetarit.
“Besimi, familja, liria dhe rendi publik”, janë katër themelet mbi të cilat Lulgjuraj ka ndërtuar fushatën e tij. Për shqiptarët e shumtë në Michigan, ai përfaqëson shpresën e një brezi të ri që dëshiron të dëgjohet dhe të bëjë diferencën.
Nëse arrin të fitojë, Robert Lulgjuraj do të bëhet shqiptaro-amerikani i parë që hyn në Kongres që nga fundi i viteve ’80, kur Joseph DioGuardi , me origjinë shqiptare dhe italiane, mbante këtë post.
