Publikimi i miliona dokumenteve të reja lidhur me Jeffrey Epstein, financieri i dënuar për abuzime seksuale, ka rikthyer në vëmendje emra të njohur nga politika dhe biznesi global, mes tyre edhe ai i Bill Gates.
Në lidhje me këto zhvillime ka reaguar ish-bashkëshortja e tij, Melinda French Gates, duke i cilësuar dokumentet si një rikujtim të dhimbshëm të periudhës së martesës së saj.
Në një intervistë për podcastin e NPR, Melinda French Gates shprehu trishtimin dhe shqetësimin e saj për akuzat që lidhen me Epstein, duke theksuar se ato i kanë rikthyer kujtime të vështira nga jeta e saj personale.
Ajo nënvizoi se personat e përmendur në dokumente, përfshirë ish-bashkëshortin e saj, duhet të japin shpjegime publike për akuzat që dalin në pah.
“Jam e lehtësuar që jam larg gjithë kësaj,” u shpreh ajo, duke reflektuar mbi ndarjen nga Bill Gates pas 27 vitesh martesë, në vitin 2021. Ndër akuzat e reja të publikuara, Epstein pretendon se Bill Gates ka patur një sëmundje të transmetueshme seksualisht.
Kjo deklaratë është mohuar kategorikisht nga një zëdhënës i Gates, i cili e cilësoi pretendimin si “plotësisht absurd dhe krejtësisht të pavërtetë”, duke e përshkruar Epstein si një “gënjeshtar të dëshmuar”.
Melinda French Gates theksoi se këto nuk janë rastet e para që e kanë shqetësuar lidhur me marrëdhënien e ish-bashkëshortit të saj me Epstein.
Ajo pranoi se gjatë martesës kishin pasur diskutime dhe tensione për këtë miqësi, e cila, sipas saj, kishte sjellë dhimbje dhe vështirësi të konsiderueshme në jetën familjare. “Është shumë e vështirë për mua kur këto detaje dalin në dritë, sepse ato hapin plagë të vjetra,” u shpreh ajo.
Nga ana e tij, zëdhënësi i Bill Gates deklaroi se dokumentet e publikuara së fundmi pasqyrojnë frustrimin e Epstein për mosarritjen e një marrëdhënieje të ngushtë apo bashkëpunimi të qëndrueshëm me Gates, si dhe përpjekjet e tij për ta diskredituar atë.
Zhvillimet e fundit kanë rihapur debatet mbi natyrën e marrëdhënies së Bill Gates me Epstein dhe ndikimin që kjo ka pasur në jetën e tij personale dhe profesionale.
