Në njësinë administrative Novoselë situata mëngjesin e kësaj të premteje është më e normalizuar. Niveli i Vjosës është ulur ndjeshëm. Prurjet nga Memaliaj dhe Përmeti janë më të pakta ç’ka rrit shpresën për përmirësim.
Problem mbetet uji në oborret e banesave në disa fshatra si Bishan, Mifol dhe Fitore por edhe në qendrën e njësisë në Novoselë. Ndërkohë niveli i Vjosës ndodhet poshtë urës së Mifolit. Kjo urë vijon të jetë ende e bllokuar për shkak të rrezikut nga prurjet por edhe inerteve apo baltës që gjendet në të.
Mësohet se janë evakuuar mbi 20 familje të tjera në zonë për shkak të prezencës së ujit. Ata janë strehuar në konviktet e qytetit ndërkohë që në Vlorë edhe reshjet e shiut janë të pakta.
Po punohet për pastrimin e kanaleve kulluese në fshatra dhe njëkohësisht për largimin e ujit nga banesat. Gjithashtu pritet të nisë vlerësimi i dëmeve në terren.
