Tiranë – Ish-kryeministri Sali Berisha ka reaguar pas paraqitjes së tij në ambientet e SPAK, ku ka dorëzuar një shënim të shkruar, në të cilin akuzon kreun e Prokurorisë së Posaçme, Altin Dumani, për mashtrim publik dhe mbështetje të krimit elektoral.
Në një deklaratë për mediat, Berisha bëri publike përmbajtjen e mesazhit që la në SPAK:
“Altin Troplini alias Dumani është një mashtrues publik i rangut më të lartë, i njëjtë me Ramaduron.”
Berisha e akuzoi Dumanin se ka mashtruar qytetarët lidhur me paditë për krime elektorale të depozituara në SPAK nga opozita:
“Paditë e sjella në SKAP, me dhjetëra e dhjetëra padi për krim elektoral, ai pati amoralitetin e plotë të mashtrojë shqiptarët se këto padi nuk kishin prova,” – u shpreh ai.
Ish-kryeministri deklaroi se do të kërkojë përgjegjësi për këtë që e cilësoi si “mashtrim publik”, duke shtuar se opozita në Kuvend do të nisë punën pikërisht me zbërthimin e kësaj çështjeje.
“Altin Troplini është edhe avokati kryesor i krimit të shëmtuar elektoral, garancia më madhore e dhunimit të çdo ligji, norme dhe standardi për votimin e lirë të shqiptarëve,” – përfundoi Berisha.
