Kreu i Partisë Demokratike, Sali Berisha, ka hedhur akuza të forta ndaj qeverisë lidhur me ndërtimin e aeroportit të Vlorës, duke e cilësuar projektin si një skemë të thellë korruptive.
Në një konferencë për mediat, Berisha denoncoi procesin e ndarjes dhe transferimit të aksioneve në projektin e aeroportit të Vlorës, duke e cilësuar atë si “një aferë korruptive të paprecedentë” që sipas tij “kërkon hetim të menjëhershëm”.
“Që në këtë moment tenderi bie poshtë,” deklaroi Berisha. “Shtylla kryesore e tenderit ishte kompania turke, e cila kishte eksperiencë në ndërtimin dhe menaxhimin e aeroporteve. Ndërkohë, kompani të tjera që nuk e kishin këtë ekspertizë u përjashtuan nga gara. Por çfarë ndodhi? Kompania me ekspertizë largohet, dhe Balluku firmos kalimin e aksioneve te MABCO, si të ishte prona e saj personale.”
Berisha ngriti dyshime të forta mbi qëllimin dhe përfituesit e vërtetë të këtij transferimi: “Tani çdo shqiptar ka të drejtë të dyshojë se ato aksione janë të Edi Ramës dhe Lubi Ballukut. Kjo kërkon hetim të thellë. Pse u angazhua me aq intensitet Rama, Balluku, Taulant Balla dhe të tjerë në këtë aferë? Sepse kemi të bëjmë me një marrëveshje mes dy ortakëve pa asnjë lidhje me shtetin.”
Ai shtoi se qeveria ka miratuar vetëm një transferim aksionesh gjatë këtyre katër viteve, dhe pikërisht atë të kompanisë turke te MABCO, çka sipas tij përbën shkelje të ligjit. “Nuk ka një dokument që të tregojë transferimin e aksioneve nga Pacolli te Valon Ademi. Nuk ka. Dhe tani të gjithë vërsulen, por unë kam denoncuar Pacollin dhe Valonin nuk e kam njohur kurrë më parë,” tha ai.
