Kryetari i Partisë Demokratike, Sali Berisha, pasditen e sotme ka prezantuar kandidatët e “PD-Aleanca për Shqipërinë Madhështore” në Kamëz.
Nga Kamza, Berisha premtoi t’u japë përgjigje problemeve që sipas tij po përjeton Kamza dhe Shqipëria.
Berisha: Probleme që e kanë bërë Kamzën, e kanë bërë Shqipërinë një vend të pajetueshëm. E kanë bërë Kamzën, e kanë bërë Shqipërinë një vend nga i cili shqiptarët vetëm largohen. E kanë bërë Kamzën, e kanë bërë Shqipërinë vendin në të cilin nga viti 2014 gjer në vitin 2023, vetëm në hapësirën e BE u larguan 1 milion e 99 mijë banorë të Kamzës dhe gjithë Shqipërisë.
Berisha u ndal te fenomeni i largimit të shqiptarëve jashtë vendit. Sipas tij, nuk u larguan nga vendi sepse nuk e donin atdheun, por sepse nuk jetonin dot në Shqipëri.
Berisha: Rrugët i morën se nuk jetonin dot në Kamzë, nuk jetonin dot në Tiranë, nuk jetonin dot në Shqipëri sepse ky regjim, Shqipërinë, Kamzën që rritej në popullatë nga viti në vit, e bëri Shqipërinë dhe Kamzën që nuk jetohej më. E bëri sofrën e familjeve shqiptare të mos pranonte as fëmijët e vet, por t’u thoshte paçi fatin, merrni rrugët e botës.
Ai u zotua para demokratëve se në 100 ditët e para të qeverisjes, nëse PD vjen në pushtet më 11 maj, pensioni minimal do të jetë 200 euro. Premtime bëri edhe për rrogat e mësuesve dhe pagën mesatare.
Berisha: Si do i rrisim pensionet dhe rrogat, që nuk do ketë rrogë nën 500 euro, rroga mesatare do jetë 1200 euro, rroga e mësuesit do bëhet 1500 euro, si do i rrisim? Do u kthejmë paratë që marrim prej jush do i kthejmë tek ju.
