Kryetari i Partisë Demokratike bëri një “antologji” politike dhe historik të partisë që nga viti 1991 dhe deri më sot, me diskursin e një feniksi që ringrihet nga hiri, pavarësisht se kundërshtarët donin ta zhduknin apo manipulonin votat dhe vinin me armë në pushtet.
Duke kujtuar atë që ndodhi me Piramidat dhe vitin 1997, teksa mori përgjegjësinë politike për firmat piramidale, ai shpjegoi se nuk mund të përfitonte politikisht duke u dhënë lekët borxhlinjve të piramidave nga arka e shtetit dhe taksat e qytetarëve.
Berisha u shpreh se tani PD është ringritur dhe gati për ta rrëzuar regjimin e Edi Ramës, dhe ata që erdhën në pushtet me dhunë, demokratët do i largojnë me votë.
Sali Berisha:
“Këto 13 vite në opozitë kanë qenë të vështira për ju, por ju rezistuat. Nëse kthejmë kokën pas, për ne demokratët veprimtaria politike është arti i të pamundurës, por ne të pamundurën e bëjmë të mundur.
A mund ta imagjinoni vitin 1992 kur erdhëm në pushtet, të gjitha premtimet tona nuk kishin praktika dhe njohuri, sepse vinim nga një sistem shkatërrues diktatorial, nga një regjim socialist, por ne arritëm që me ideale dhe shpejtësi të madhe të hedhim bazat për sistem demokratik në Shqipëri.
Nga viti në vit vendi dyfishonte të ardhurat, nga një vend i kolektivizuar si Korea e Veriut arriti në vendin më të privatizuar, ekonomisë së lirë dhe u hap ndaj botës. Por siç dihet patëm një moment të vështirë, të rëndë, skemat piramidale. Nuk do bëjë historinë e tyre, ne nuk i njihnim por edhe pse s’i njihnim përgjegjësia ishte e jona. Morëm përgjegjësinë, u dorëhoqëm, por u përpoqën të na zhduknin, të na fshinin nga faqja e dheut, që emri ynë të harrohej.
Por çfarë ndodhi, u ngritëm si feniksi nga hiri. Jeni dëshmitarë, ku e nisëm ne më 1997 dhe pse u ngritëm? Për dy arsye. E para, u treguam të ndershëm me qytetarët, qeveria nuk kishte prekur asnjë qindarkë. E dyta, u thamë qytetarëve se nuk ktheheshin, sepse ato nuk ishin marrë nga qeveria, duhej të merreshin nga qytetarët shqiptarë nga buxheti e t’u jepej, por kjo ishte e pamoralshme, e pandershme.
Kur kundërshtari im thoshte do kthej çdo qindarkë, unë thashë se s’ua kthej dot, sepse ishte e dhimbshme, nuk mund ta bënim dot atë, sepse në do ishim zhdukur fare, por ja ku jemi.
U përpoqën, çfarë akuzash nuk na bënë, krime kundër njerëzimit, dilnin me një shishe “Pepsi” dhe thoshin se ishte me helm. Donin të vrisnin idealet tona, por logoja jonë ishte më e votuara. I plaçkitën por e kapëm hajdutin për fyti, mbrojtëm votën. Komuniteti ndërkombëtar ndryshoi raportin sipas të dhënave tona, ata që erdhën me dhunë ne i përzumë me votë. Në këto vite Shqipëria ndryshoi tërësisht”.
