Kryetari i Partisë Demokratike Sali Berisha, reagoi për dorëheqjen e sekretarit të përgjithshëm të Këshillit të Ministrave Engjëll Agaçi, duke e cilësuar atë si një person të përfshirë në botën e krimit.
“Don Agaçio dhuratëmadhi është një nga kockat mafioze më të rrezikshme të Ballkanit. Me veprimtari mafioze kundër Shqipërisë dhe Italisë. Unë kam besim të madh se në të dy vendet ky mafioz do të bëhet përgjegjës para ligjit. Kurse për Vali Bizhgën mund të them se të dy janë minj që ikin kur mbytet anija, për të mos u mbytur vetë. Por ligji do të jetë i pamëshirshëm për të dy”, tha Berisha.
Sipas Berishës, qëndrimet e kryeministrit Rama sa i përket çështjes “Balluku” nuk vijnë për të mbrojtur numrin dy të qeverisë, por veten e tij.
“Nuk mbron Lubinë por veten. Për Lubinë në mesnatë vajt të nxehtë dhe plumb të shkrirë i hidhte në vesh. Do ta kishte eliminuar. Po mbron veten sepse në çdo firmë të Lubisë është firma e tij”, deklaroi kreu i PD.
Kryeopozitari komentoi dhe protestën e ardhshme të 20 shkurtit, teksa theksoi se do të jenë qytetarët ata që do të vendosin lëvizjet dhe skenarët e tubimit.
“Nuk e ndërpresim kryengritjen pa rrëzuar narkoshtetin. Ideja juaj që të mos largohemi nga sheshi është absolutisht ideja më e drejtë. Në momentin më të parë që qytetarët do të vendosin, ajo do të jetë edhe faza përfundimtare e ditores tonë”, tha Berisha.
Nuk harroi as ironitë me Lulzim Bashën dhe Ervin Salianjin.
“Mendoj se demokratët u bashkuan. Por përsëri mbi bazën e kontributit që kanë unë nuk ja mohoj asnjeriu. Nuk bëhet fjalë këtu për Bashën dhe pasaardhësin e tij Salianji. Për këta nuk mund të bëhet fjalë se, këta janë fatkëqinj. Njerëz të përdorur në shkallë ekstreme nga Edi Rama”, tha kreu i PD.
Bashkëbisedimin e tij online me qytetarët, Berisha e mbylli me një ftesë për t’iu bashkuar protestës javën e ardhshme.
