Këta janë dy vëllezërit Artur dhe Durim Gurzi, të cilët janë arrestuar në kuadër të operacionit të koduar “Blloku 33”, që kishte në shënjestër një organizatë kriminale të përfshirë në trafikun dhe shpërndarjen e lëndëve narkotike në disa nga lokalet e natës më të njohura në Tiranë dhe rrethina.
Sipas hetimeve, Artur dhe Durim Gurzi dyshohen si drejtuesit e këtij rrjeti të strukturuar kriminal, i përbërë nga 42 anëtarë në total. Deri më tani, policia ka arrestuar 25 persona, ndërsa 8 të tjerë janë shpallur në kërkim.
Në kërkim mësohet se është edhe vëllai i tretë i tyre. Vëllezërit dyshohen si furnitorët me lëndë narkotike të shpërndarësve në zonën e ish-Bllokut. Shumë nga të arrestuarit janë banakierë dhe kamerierë lokalesh, teksa një prej tyre është femër.
Operacioni “Blloku 33” u zhvillua pas një periudhe të gjatë ndjekjeje dhe përgjimesh, që zbuluan aktivitetin e organizuar të shpërndarjes së drogës në ambientet e natës, ku përfshiheshin menaxherë lokalesh, kamarierë dhe shpërndarës të përhershëm. Autoritetet po vijojnë hetimet për identifikimin dhe kapjen e personave të tjerë të përfshirë në këtë rrjet.
