Jude Bellingham po sillet gjithnjë e më shumë si lider i Anglisë, edhe pse është vetëm 23 vjeç. Pas kualifikimit në gjysmëfinalet e Kupës së Botës, mesfushori i Real Madridit iu përgjigj hapur trajnerit Thomas Tuchel, i cili nuk ishte aspak i kënaqur me paraqitjen e skuadrës ndaj Norvegjisë.
Tuchel kishte folur për përkushtim dhe karakter, por njëkohësisht kishte kritikuar mënyrën e lojës së Anglisë, duke e cilësuar ekipin të pasaktë, të ngadaltë dhe me shumë gabime teknike.
“Përkushtimi është aty, por ne i komplikojmë shumë gjërat me lojën tonë. Ishim të pakujdesshëm, bëmë shumë gabime teknike dhe na mungoi shpejtësia e vazhdimësia. Sot patëm fat”, deklaroi trajneri gjerman.
Por Bellingham nuk e priti mirë këtë koment. Kur iu përcollën fjalët e Tuchel, ylli anglez ndryshoi menjëherë shprehjen dhe mbrojti shokët e skuadrës.
“Nëse ai thotë se nuk luajtëm mirë, është sepse nuk e di çfarë do të thotë të përballesh me lojtarë si Haaland, Sørloth, Nusa apo Ødegaard. Fitorja nuk është gjithmonë vetëm të qarkullosh topin. Ndonjëherë duhet të zbresësh në fushë, të luftosh dhe të bësh fanellën me baltë”, u shpreh Bellingham.
Mesfushori theksoi se Anglia bëri një ndeshje të fortë fizikisht dhe mendërisht ndaj një kundërshtari shumë të rrezikshëm.
“Djemtë bënë një ndeshje të madhe dhe ne jemi mes katër skuadrave më të mira të Botërorit. Është e vështirë aty jashtë, kërkon shumë punë. Të gjithë lojtarët dhanë gjithçka dhe meritojnë falënderime”, shtoi ai.
I pyetur në fund për deklaratën e Tuchel se Anglia kishte fituar me fat, Bellingham zgjodhi të mos e zgjasë më shumë debatin.
“Pa koment”, tha shkurt ylli i Real Madridit.
Me këtë reagim, Bellingham jo vetëm mbrojti skuadrën, por tregoi edhe një herë peshën që ka fituar brenda dhomës së zhveshjes. Anglia është në gjysmëfinale dhe tashmë lideri i saj nuk flet më vetëm me gola, por edhe me karakter.
