Bashkimi Evropian ka propozuar ndalimin e plotë të importeve të gazit të lëngshëm natyror (LNG) nga Rusia deri më 1 janar 2027, si pjesë e një pakete të re sanksionesh që synon të godasë burimet financiare të Kremlinit për luftën në Ukrainë.
Shefja e Komisionit Evropian, Ursula von der Leyen, theksoi se ekonomia ruse mbështetet fort te të ardhurat nga karburantet fosile dhe se tani është momenti për të vepruar.
“Ekonomia e luftës së Rusisë mbahet në këmbë nga të ardhurat e gazit dhe naftës. Është koha që ta mbyllim çezmën,” deklaroi ajo.
Paketa e re, e cila është e 19-ta me radhë që nga fillimi i luftës në Ukrainë, do të duhet të miratohet nga të gjitha 27 vendet anëtare të BE-së. Aktualisht, shumica e tyre kanë ndërprerë importet e naftës dhe gazit rus, përveç Hungarisë dhe Sllovakisë, që vazhdojnë të furnizohen.
Ky propozim i BE-së vjen edhe pas presionit të presidentit amerikan, Donald Trump, i cili javën e kaluar bëri thirrje që aleatët të ndalojnë blerjet e naftës ruse dhe të vendosin tarifa ndaj Kinës, nëse duan një qëndrim më të ashpër të SHBA-ve ndaj Vladimir Putin.
“Ne duam që Rusia të ndalë luftën. Për këtë duhet t’i presim burimet që e mbajnë në këmbë”, është thelbi i mesazhit që po përçojnë zyrtarët evropianë.
Shefja e diplomacisë së BE-së, Kaja Kallas, në një reagim në rrjetin social X theksoi:
“Qëllimi ynë është të përshpejtojmë fazën e heqjes dorë nga gazi rus deri më 1 janar 2027, një vit më herët se sa ishte planifikuar.”
Sipas të dhënave të Komisionit Evropian, varësia e BE-së nga gazi rus ka rënë ndjeshëm nga 45% në vitin 2021 në 19% në vitin 2024, falë rritjes së blerjeve nga vende të tjera, sidomos përmes gazit të lëngshëm që transportohet me anije.
Nëse paketa e re miratohet, do të shënojë një hap vendimtar në shkëputjen përfundimtare të Evropës nga energjia ruse, dhe një sinjal i qartë për unitetin transatlantik ndaj agresionit të Rusisë në Ukrainë.
