Bayern Munich po përgatit një lëvizje të madhe në merkato për të siguruar Anthony Gordon nga Newcastle United.
Sipas Bild, bavarezët dëshirojnë ta afrojnë anësorin anglez, por për momentin nuk janë gati të paguajnë të gjithë shumën që kërkon Newcastle, e cila raportohet të jetë rreth 68 milionë paund.
Për këtë arsye, Bayern po mendon të përfshijë në marrëveshje portierin Alexander Nübel, së bashku me një shumë parash. Nübel ka përfunduar huazimin te Stuttgart dhe pritet të rikthehet te Bayern, por nuk shihet si pjesë e planeve për sezonin e ardhshëm.
Newcastle, nga ana tjetër, është në kërkim të një portieri të ri, pasi e ardhmja e Nick Pope mbetet e pasigurt. Kjo mund ta bëjë Nübel një opsion interesant për klubin anglez.
Drejtuesit e Bayernit kanë konfirmuar se në portë do të mbështeten te Manuel Neuer, Jonas Urbig dhe Sven Ulreich, duke e lënë Nübel jashtë hierarkisë kryesore.
Ndërkohë, Bayern ka dhënë sinjale të qarta se kërkon të përforcojë sulmin. Max Eberl ka pranuar se klubi do të firmosë me një lojtar ofensiv nëse operacioni është i përballueshëm financiarisht.
Çështja Gordon mund të zgjasë gjatë verës, sidomos për shkak të angazhimeve në Kupën e Botës. Newcastle po vlerëson edhe alternativa të tjera, ndërsa Bayern shpreson ta ulë koston e operacionit përmes një marrëveshjeje me lojtar plus para.
