Drejtori sportiv i Bayern Munich, Max Eberl, ka zbuluar se klubi kërkoi mendimin e Pep Guardiola para se të emëronte Vincent Kompany në krye të skuadrës.
Emërimi i trajnerit belg në vitin 2024 u prit fillimisht me dyshime, sidomos pas sezonit të vështirë me Burnley në Premier League, që përfundoi me rënien nga kategoria. Për këtë arsye, drejtuesit e Bayern kërkuan një vlerësim nga Guardiola, i cili e njihte mirë Kompany nga koha te Manchester City.
Eberl ka treguar për televizionin gjerman ZDF momentin që ndikoi në vendimin final.
“Kur u ngrit pyetja nëse ishim vërtet të sigurt, i thashë Kalle Rummenigge: ‘Kalle, ti je shumë i afërt me Pep, apo jo? Telefonoji dhe pyete çfarë mendon për Kompany.’ Ky ishte momenti vendimtar”, deklaroi Eberl.
Drejtori sportiv pranoi se Kompany nuk ishte zgjedhja e parë e Bayern për të zëvendësuar Thomas Tuchel. Klubi kishte biseduar më parë me disa trajnerë të njohur, mes tyre Julian Nagelsmann, Ralf Rangnick dhe Oliver Glasner, ndërsa disa brenda klubit dëshironin edhe rikthimin e Hansi Flick.
“E ndjeva se në fillim kishte pikëpyetje dhe surprizë kur propozova emrin e Kompany. Ai ishte në listën tonë, por të jem i sinqertë, nuk guxova ta propozoja menjëherë si zgjedhjen e parë. Fillimisht iu drejtuam trajnerëve me më shumë emër dhe famë”, tha Eberl.
Megjithatë, vendimi për t’i besuar Kompany rezultoi i suksesshëm. Trajneri belg ka sjellë trofe dhe një frymë të re në skuadër, duke udhëhequr Bayern drejt titujve radhazi në Bundesliga, Superkupës së Gjermanisë, si dhe drejt fazave të avancuara në Champions League dhe DFB-Pokal.
Ndikimi i tij është parë edhe në mënyrën si menaxhon grupin në momente të vështira. Pas një pjese të parë të dobët ndaj Mainz, ku Bayern ishte në disavantazh 3-0, Kompany reagoi fort në dhomat e zhveshjes dhe skuadra arriti të rikthehej.
“Kam përjetuar vetë momente të tilla gjatë karrierës. Kur je 3-0 në disavantazh në pushim, duket sikur ndeshja ka mbaruar. Por duhet ta kanalizosh zemërimin, të refuzosh humbjen dhe të vazhdosh të shtysh deri në minutën e fundit. Kjo është pikërisht ajo që bënë djemtë”, u shpreh Kompany.
Tashmë vëmendja e Bayern është te Champions League, ku skuadra do të përballet me Paris Saint-Germain në gjysmëfinale. Për Kompany, kjo është mundësia për të konfirmuar veten në nivelin më të lartë evropian, vetëm pak vite pasi drejtonte në Championship.
