Presidenti i Barcelonës, Joan Laporta, ka njoftuar planet për ndërtimin e një statuje në nder të Lionel Messit jashtë “Camp Nou”-t të ri, si një shenjë respekti për kontributin historik të argjentinasit në klubin katalanas.
Laporta theksoi se Messi e meriton një nderim të tillë dhe se klubi do të përgatisë një projekt për statujën, në bashkëpunim me vetë lojtarin dhe familjen e tij.
“Messi meriton të ketë statujën e tij jashtë stadiumit. Do të përgatisim një plan, do të flasim me të dhe nëse pranojnë, do të ecim përpara,” deklaroi presidenti i Barcelonës.
Pas njoftimit, rrjetet sociale janë mbushur me komente dhe dizajne të shumta nga tifozët që presin me entuziazëm përurimin e monumentit.
Lionel Messi luajti për Barcelonën nga viti 2004 deri në 2021, duke u bërë golashënuesi më i mirë në historinë e klubit me 672 gola në 778 ndeshje, si dhe 303 asistime. Ai fitoi katër herë Champions League dhe dhjetëra trofe të tjerë kombëtarë.
Edhe pse u largua në vitin 2021 jo në mënyrën që dëshironte, Messi mbetet figura më e dashur për tifozët katalanas. Kohët e fundit, ai është parë përsëri në Barcelonë, ku vizitoi gjatë natës stadiumin e ri në ndërtim “Camp Nou”.
Në rrjetet sociale, reagimet për nderimin e tij janë të shumta dhe emocionale, me fansat që e cilësojnë këtë vendim si “drejtësi për legjendën më të madhe të klubit”.
