Barcelona ka bërë një hap konkret për rikthimin e João Cancelo në “Camp Nou”. Sipas gazetarit të njohur dhe “insider”-it Fabrizio Romano, katalanasit i kanë paraqitur një ofertë zyrtare klubit saudit Al Hilal për mbrojtësin portugez.
Raportimet bëjnë të ditur se Barcelona është e gatshme ta marrë Cancelon në formë huazimi deri në fund të sezonit dhe të mbulojë pjesërisht pagën e tij.
Më herët ishte raportuar se Cancelo ishte shumë pranë kalimit te Interi, madje klubet thuhej se kishin arritur marrëveshje. Megjithatë, vetë lojtari e ka pezulluar përkohësisht transferimin, me synimin për të tentuar kalimin te Barcelona — klubi ku ai dëshiron të luajë.
Cancelo ka edhe eksperiencë të mëparshme me Barcelonën. Në sezonin 2023-24, ai u aktivizua në Katalonjë si i huazuar nga Manchester City (klubi që zotëronte kartonin e tij në atë periudhë).
Gjatë asaj aventure, portugezi zhvilloi 42 ndeshje me fanellën blaugrana, shënoi 4 gola dhe dha 5 asistime.
Aktualisht, Cancelo ka kontratë me Al Hilal deri në verën e vitit 2027, ndërsa vlera e tij në treg vlerësohet rreth 10 milionë euro nga Transfermarkt.
