Te Barcelona është shtuar shqetësimi për Robert Lewandowskin, pas vendimit të tij për të vazhduar lojën në ndeshjen mes Polonisë dhe Lituanisë, pavarësisht shqetësimeve fizike që ndiente që në fillim.
Sipas “Mundo Deportivo”, klubi katalanas është i habitur dhe i irrituar që sulmuesi me kaq shumë përvojë zgjodhi të mos ndalet, duke rrezikuar të përkeqësojë gjendjen e tij. Lewandowski, megjithëse ndiente dhimbje, vuri një fashë kompresive, luajti 90 minuta të plota, madje shënoi edhe një gol — por u rikthye në Barcelonë i dëmtuar.
Kontrollet mjekësore kanë konfirmuar një dëmtim në kofshë, që pritet ta mbajë jashtë për disa ndeshje të rëndësishme. Ai do të mungojë në La Liga kundër Girona-s, si dhe në Champions League kundër Olympiakos-it, ndërsa është praktikisht i përjashtuar edhe nga El Clásico në “Santiago Bernabéu”.
Në “Camp Nou”, kjo situatë është parë si e papërgjegjshme, duke pasur parasysh kalendarin e ngarkuar dhe rolin që Lewandowski ende ka në skuadër. Pavarësisht se këtë sezon ka humbur statusin e titullarit absolut, ai mbetet një lojtar me ndikim — me 4 gola të shënuar deri tani, është golashënuesi i dytë i Barcelonës pas Ferran Torres-it.
Përveç dëmtimit, vazhdojnë edhe thashethemet për të ardhmen e tij, të ushqyera nga deklaratat e agjentit Pini Zahavi, i cili ka pranuar se ende nuk është e qartë ku do të luajë Lewandowski sezonin e ardhshëm.
Në Barcelonë, ku durimi ndaj situatave të tilla po shteron, ky episod shihet si një tjetër sinjal se koha e bomberit polak — tashmë 37 vjeç — mund të jetë drejt fundit të saj në “Camp Nou”.
