UEFA ka vendosur masa disiplinore ndaj Lech Poznanit dhe Partizanit të Beogradit, pas shfaqjes së banerave me përmbajtje politike gjatë ndeshjeve të fundit në garat evropiane.
Klubi polak Lech Poznan u gjobit me 10 mijë euro për një baner gjigant me mbishkrimin “Kosova është Serbi”, i shfaqur në ndeshjen e raundit të tretë kualifikues të Conference League kundër Crvena zvezdës. Vendimi u publikua të enjten nga Komisioni Disiplinor i UEFA-s.
Ndërkohë, Partizani i Beogradit mori një dënim total prej 90 mijë e 250 eurosh për incidentet e tifozëve në përballjet ndaj Oleksandriyës dhe Hibernianit në kualifikimet e Conference League. Vetëm për ndeshjen ndaj Oleksandriyës, të zhvilluar më 31 korrik, klubi serb u gjobit me 17 mijë e 500 euro për banerat e papërshtatshme, përfshirë edhe mesazhin “Kosova është Serbi”.
Pjesa tjetër e dënimit, 72 mijë e 750 euro, lidhet me bllokimin e rrugëve, përdorimin e lazerëve dhe ndezjen e fishekzjarrëve në dy ndeshjet e zhvilluara në Beograd. Si masë shtesë, në ndeshjen e ardhshme të UEFA-s në shtëpi, Partizani i Beogradit do të ketë 10 mijë tifozë më pak në tribuna.
