Burri i një doktoreshe palestineze në Gaza, fëmijët e së cilës u vranë në një sulm ajror izraelit të premten, vazhdon të jetë në gjendje kritike, sipas spitalit që po e trajton. Hamdi al-Najjar është “në rrezik për jetën”, tha për BBC-në Dr. Milena Angelova-Chee, një mjeke bullgare që punon në spitalin Nasser në Khan Younis.
Një sulm izraelit vrau nëntë nga 10 fëmijët e çiftit të premten dhe la të plagosur atë dhe djalin e tyre 11-vjeçar. Ushtria izraelite ka thënë se incidenti është në shqyrtim. Ndërkohë, Kryqi i Kuq njoftoi se dy punonjës të tij u vranë në një sulm ndaj ndërtesës së tyre në Khan Younis të shtunën. Vrasja e Ibrahim Eid, një specialist për pastrimin e armëve, dhe Ahmad Abu Hilal, një roje sigurie në Spitalin Fushor të Kryqit të Kuq në Rafah, “tregon për numrin e papërballueshëm të viktimave civile në Gaza”, tha ICRC, duke përsëritur thirrjen për armëpushim.
Të dielën, Ministria e Shëndetësisë e udhëhequr nga Hamasi njoftoi se sulmet ajrore izraelite kishin vrarë 23 persona që nga agimi, përfshirë një zyrtar të lartë të shërbimit të emergjencës dhe një gazetar. Ashraf Abu Nar, një zyrtar i lartë në shërbimin civil të emergjencës në territor, dhe gruaja e tij u vranë në shtëpinë e tyre në Gazën qendrore, sipas zyrtarëve shëndetësorë, ndërsa gazetari Hassan Majdi Abu Uarda dhe disa anëtarë të familjes së tij u vranë nga një sulm ndaj shtëpisë së tyre në Jabalia, në Gazën veriore.
Hamdi al-Najjar – edhe ai mjek si bashkëshortja e tij – pësoi dëmtime të rënda në tru, mushkëri, krahun e djathtë dhe veshkë në sulmin e së shtunës, tha Dr. Angelova-Chee. Spitali po “bën gjithçka që mundet për të”, shtoi ajo. Djali i mbijetuar i çiftit, Adam, gjithashtu u plagos. Dr. Angelova-Chee tha se kolegët i kishin thënë se ai është “duke u përmirësuar disi”.
Dr. Alaa al-Najjar po punonte në spitalin Nasser kur ndodhi sulmi izraelit. Video e shpërndarë nga Drejtori i Ministrisë së Shëndetësisë, Dr. Muneer Alboursh, dhe e verifikuar nga BBC, tregonte trupa të vegjël të djegur që nxirreshin nga rrënojat. Nëntë fëmijët – Yahya, Rakan, Raslan, Gebran, Eva, Rival, Sayden, Luqman dhe Sidra – ishin të moshës nga disa muaj deri në 12 vjeç.
Kolegia e saj po përballet me “vuajtje të patregueshme”, tha Dr. Angelova-Chee. Aktualisht, “prioriteti i Alaas është familja e saj”, shtoi ajo, duke theksuar: “Ajo nuk është e vetmja në këtë situatë; shumë familje janë në të njëjtën pozitë.”“Të gjithë janë vërtet të tronditur sepse kjo ka vazhduar për 18 muaj tashmë dhe përkeqësohet nga kërcënimi i vazhdueshëm për jetën, zhvendosjet dhe evakuimet e vazhdueshme”, përfundoi ajo.
Forcat e Mbrojtjes së Izraelit (IDF) deklaruan të shtunën se “avionët goditën disa të dyshuar që u identifikuan duke vepruar nga një strukturë pranë trupave të IDF në zonën e Khan Younis”./BBC/
