Roma eliminohet nga Europa League dhe Claudio Ranieri ndal kështu një seri prej 8 ndeshjesh radhazi pa humbje (e fundit ishte ndaj Milanit në Coppa Italia) Skuadra verdhekuqe shkonte në tokën baske pas suksesit të arritur në Itali ndaj ekipit të Athletic Bilbaos, por u deshën vetëm 11 minuta që bota të shembej mbi kokën e ekipit italian pasi dalja me të kuq nga Hummels ndryshoi planet dhe nga aty u kthye në një ndeshje ku grushtet e ekipit spanjoll vinin nga të gjitha anët dhe Roma ishte thesi i varur.
Dhe në fakt, u desh pak mes shtyllave dhe rasteve të humbura që miqtë të pësonin golin nga Bilbao, që gjeti ne fund të pjesës së parë avantazhin me Nico Williams. Pjesa e dytë ishte e njëjta histori dhe vendasit fillimisht dyfishuan me anë të Yuri Berchiche dhe më pas Williams mbylli llogaritë në një 3-0 që nuk i la mundeësi për iluzione ekipit verdhekuq. Në fund, penalltia e Paredes ishte thjesht një ngushëllim për vulën e rezultatit final 3-1.
Bilbao, që edhe në La Liga është duke u paraqitur mirë, kalon kështu në çerekfinale, teksa synimi është finalja e madhe duke qenë se ajo zhvillohet pikërisht në San Mames.
E ndërsa një ekip tjetër italian eliminohet, ia del mes vështirësive dhe vuajtjeve edhe Lazio që ndaj ekipit çek Plzen arrin të ruajë barazimin në Romë dhe në sajë të suksesit të arritur në transfertë kalon më tej. Një frikë e madhe erdhi pjesën e dytë duke qenë se miqtë shënuan gol në minutën e 52-të me Sulc por ishte Patrick ai që barazoi shifrat.
Shkatërrues Eintracht Frankfurt në Gjermani ndaj Ajax dhe një kualifikim mëse i merituar. Skuadra gjermane u lëshua si “uragan” dhe në 25 minuta gjeti dy gola me Gotze dhe Bahoya. Gjermani do të kompletonte dygolëshin e natës në pjesën e dytë teksa përpara tij kishte shënuar edhe i zakonshmi Ekitike. Shumë pak për Ajax që shënoi vetëm një gol në Frankfurt por përshëndeti kompeticionin.
Nuk ia del dot të përmbysë Bodo Glimt skuadra e Olympiacos që edhe pse shënoi dy gola pësoi një nga miqtë që shënuan të parët. Në çerekfinale kalon ekipi norvegjez që vitet e fundit në Kupat e Europës është treguar një hirushe shumë e bukur. Fitorja 2-1 në Athinë e ekipit grek nuk vlen pasin pasi e para doli 3-0 për Bodo Glimt.
