Sistemi i furnizimit me ujë i Athinës po përballet me presion gjithnjë e më të madh, pasi rezervuari kryesor i Mornosit është në nivele kritike, me një ulje të konsiderueshme të furnizimit me ujë të pijshëm. Një studim i Observatorit Kombëtar të Athinës ka treguar se niveli i ujit në liqen ka arritur një pikë kritike për herë të dytë brenda dy dekadave të fundit.
Rezervuari i Mornosit tani funksionon vetëm në 60-65% të kapacitetit të tij, një ulje e vazhdueshme që ka nisur që nga viti 2022, kur liqeni ishte afër kapacitetit të plotë. Vetëm në vitin 2008 është regjistruar një sipërfaqe më e ulët në të njëjtin muaj. Edhe rezervuari i Evinosit, që ndihmon furnizimin, ka pësuar një rënie të rëndë, duke arritur në 2.3 km² në maj 2025, shumë poshtë nivelit të duhur.
Të dy rezervuarët janë aktualisht në rreth 60% të kapacitetit të tyre, për shkak të kushteve të thatësirës, reshjeve të ulëta dhe temperaturave të larta. Ekspertët paralajmërojnë për një situatë të pasigurt për të ardhmen, duke theksuar nevojën në rritje të ujit për një popullsi të madhe dhe turizmin gjithnjë në rritje në Athinë, e cila ka mbi 3.6 milion banorë.
Edhe pse parashikimet për vitin 2025 flasin për një përmirësim të lehtë, ka shqetësime se niveli i ujit mund të dobësohet më tej për shkak të ndryshimeve klimatike dhe ngrohjes globale. Raporti kërkon ndërhyrje të menjëhershme nga qeveria greke për të parandaluar përkeqësimin e situatës.
