Me urdhër të prokurorisë është ndaluar polici me iniciale B.K., i cili dyshohet se ka qëlluar me armë zjarri në drejtim të autorëve të atentatit të ndodhur mbrëmjen e djeshme në Lezhë.
Efektivi i policisë akuzohet për veprën penale të shpërdorimit të detyrës. Ai ka qenë i pranishëm brenda një berberhaneje, ku ndodhej edhe 21-vjeçari Merando Nikulaj, shënjestra e sulmit me armë.
Gjatë atentatit, i riu është qëlluar me armë zjarri, ndërsa polici B.K. ka reaguar duke kundërpërgjigjur me armë ndaj autorëve, të cilët më pas janë larguar nga vendngjarja.
Nga të dhënat hetimore, dyshohet se sulmi është kryer nga tre persona, një në rolin e drejtuesit të mjetit dhe dy të tjerë si qitës. Autorët kanë qenë të maskuar dhe, sipas hetuesve, nuk duket se kanë pasur përvojë profesionale në përdorimin e armëve të zjarrit, pasi breshëria e plumbave ka rrezikuar edhe jetën e kalimtarëve.
Pamjet nga kamerat e sigurisë nuk kanë mundur ende të identifikojnë fytyrat e autorëve, megjithatë policia dyshon se ka arritur të identifikojë njërin prej tyre.
Ndërkohë Sokol Daci, i cili mbeti i plagosur aksidentalisht i është nënshtruar një ndërhyrjeje kirurgjikale mbrëmjen e kaluar, pasi plumbi i marrë në bark i ka shkaktuar hemorragji të shumta. Aktualisht, ai raportohet në gjendje të stabilizuar dhe jashtë rrezikut për jetën.
Përveç plagës në bark, 21-vjeçari ka marrë edhe dy plumba të tjerë, një në shpatull dhe një në këmbë. Hetimet për zbardhjen e plotë të ngjarjes vijojnë.
