Një incident i tmerrshëm ndodhi sot në një shkollë profesionale në Gjermani, ku një nxënës 18-vjeçar, me origjinë nga Kosova, sulmoi një mësuese me thikë, duke e goditur në bark.
Ngjarja ka ndodhur në lagjen Nordviertel, në “Bildungspark”, dhe ka shkaktuar një operacion të gjerë të policisë dhe shërbimeve të emergjencës në vend. Mësuesja, e cila pësoi plagë të rënda, u dërgua me urgjencë në spitalin universitar, por fatmirësisht, është jashtë rrezikut për jetën.
Sipas raportimeve të mediave, autoritetet ende po hetojnë për detajet e incidentit, veçanërisht se si nxënësi arriti të kryejë sulmin. Ende nuk dihet nëse ai ishte në mësim kur ndodhi ngjarja apo hyri me forcë në ambientet e klasës. Pas sulmit, ai u largua nga vendngjarja, çka çoi në një kërkim të gjerë nga policia.
Rreth orës 11:00, policia mori një njoftim për një person të dyshimtë tre kilometra larg shkollës, i cili përputhej me përshkrimin e autorit. Gjatë përballjes me forcat speciale, dyshohet se i riu ka lungurar thikën drejt policisë, e cila reagoi duke e qëlluar dhe neutralizuar atë. Pas kësaj, ai është arrestuar dhe ndodhet në mbikëqyrje.
Forcat e armatosura kanë rrethuar shkollën dhe kanë përdorur një helikopter për të patrulluar ajrin, duke siguruar zonën përreth dhe duke parandaluar çdo rrezik të mundshëm.
Ky sulm ka shkaktuar frikë e shqetësim në komunitet, duke nxitur diskutime të reja rreth sigurisë në shkollat gjermane. Incidentet e tilla kanë ngritur pyetje të shumta rreth arsyeve dhe motiveve që çojnë në një veprim të tillë ekstrem, dhe si mund të parandalohet që situata të përshkallëzohet në të ardhmen.
Autoritetet tani janë përqendruar në zbardhjen e motiveve që qëndrojnë pas sulmit dhe në sigurimin e sigurisë së studentëve dhe stafit.
