Atalanta ka fituar 0-5 në transfertë ndaj Empoli-t, në ndeshjen e vlefshme për javën e 26-të të Serisë A. Fillimisht ishte Gyasi që shënoi autogol, më pas Retegui dyfishoi shifrat për “bergamaskët”. Ademola Lookman shënoi golin e tretë në minutën e 43-të, pjesa e parë u mbyll me shifrat 0-3.
Në pjesën e dytë, ishte Lookman që shënoi golin e dytë personal në këtë takim. Davide Zappacosta vulosi fitoren e thellë të Atalantës, duke shënuar golin e pestë. Pas kësaj fitoreje, Atalanta mbetet e treta me 54 pikë, dy pikë më pak se Napoli dhe tre pikë më pak se Inter i vendit të parë.
Lajmi i keq për këtë takim ishte dëmtimi i Berat Gjimshiti, mbrojtësi kuqezi u zëvendësua në minutën e 63-të, dhe në pamje të parë dukej që bëhet fjalë për diçka serioze. Gjimshiti u largua duke çaluar, tani pritet informacioni zyrtar që do të japë klubi i Atalanta-s për dëmtimin e tij.
Urojmë që të mos jetë diçka e rëndë, duke ditur që po afrojnë dhe dy ndeshjet e Kombëtares për kualifikueset për Kupën e Botës, mungesa e Gjimshitit do ishte një goditje e rëndë për kuqezinjtë.
